Te tassa vacanaṃ sutvā sāvatthiṃ gantvā migāraseṭṭhissa tuṭṭhiñca vuḍḍhiñca pavedetvā "laddhā no sāmi sākete dhanañjayaseṭṭhissa gehe dārikā"ti āhaṃsu. Taṃ sutvā migāraseṭṭhī "mahākulagehe kira no dārikā laddhā"ti tuṭṭhamānaso hutvā tāvadeva dhanañjayaseṭṭhino sāsanaṃ pahiṇi "idāneva dārikaṃ ānayissāma, kattabbakiccaṃ karotū"ti. Sopissa paṭisāsanaṃ pesesi "nayidaṃ amhākaṃ bhāriyaṃ, seṭṭhī pana attano kattabbakiccaṃ karotū"ti. So kosalarañño santikaṃ gantvā ārocesi "deva ekā me maṅgalakiriyā atthi, dāsassa te puṇṇavaḍḍhanassa dhanañjayaseṭṭhino dhītaraṃ visākhaṃ nāma dārikaṃ ānessāmi, sāketanagaragamanaṃ me anujānāthā"ti.
Deva tumhādisānaṃ gamanaṃ kathaṃ laddhuṃ sakkāti. Rājā mahākulassa saṅgahaṃ kātukāmo "hotu seṭṭhi, āgamissāmī"ti sampaṭicchitvā migāraseṭṭhinā saddhiṃ sāketanagaraṃ agamāsi. Dhanañjayaseṭṭhī "migāraseṭṭhī kira kosalarājānaṃ gahetvā āgato"ti sutvā paccuggamanaṃ katvā rājānaṃ gahetvā attano nivesanaṃ agamāsi. Tāvadeva rañño ca rājabalassa ca migāraseṭṭhino ca vasanaṭṭhānaṃ ceva mālāgandhabhattādīni ca sabbāni paṭiyādesi. "idaṃ imassa laddhuṃ vaṭṭati, idaṃ imassā"ti sabbaṃ attanāva jānāti. Te te janā cintayiṃsu "seṭṭhī amhākameva sakkāraṃ karotī"ti.
Athekadivasaṃ rājā dhanañjayaseṭṭhino sāsanaṃ pahiṇi "na sakkā seṭṭhinā cirakālaṃ amhākaṃ bharaṇaposanaṃ kātuṃ, dārikāya gamanakālaṃ jānātū"ti. Sopi rañño sāsanaṃ pesesi "idāneva vassakālo āgato, na sakkā catumāsaṃ vicarituṃ, tumhākaṃ balakāyassa yaṃ yaṃ laddhuṃ vaṭṭati, sabbantaṃ mama bhāro. Kevalaṃ devo mayā pesitakāle gacchatū"ti. Tato paṭṭhāya sāketanagaraṃ niccaṃ nakkhattagāmo viya ahosi. Evaṃ tayo māsā atikkantā. Dhanañjayaseṭṭhino pana dhītuyā mahālatāpasādhanaṃ na tāva niṭṭhaṃ gacchati. Athassa kammantādhiṭṭhāyakā āgantvā ārocayiṃsu "tesaṃ asantaṃ nāma natthi, balakāyassa pana pacanadārūni nappahontī"ti. Gacchatha tātā, hatthisālā assasālā viyojetvā bhattaṃ pacathāti. Evaṃ pacantānaṃpi aḍḍhamāso atikkanto. Tato puna ārocayiṃsu "dārūni sāmi nappahontī"ti. Tātā imsamiṃ kāle dārūni laddhuṃ na sakkā, dussakoṭṭhāgāraṃ pana vivaritvā thūle thūle sāṭake gahetvā vaṭṭiyo katvā telacāṭiyaṃ temetvā bhattaṃ pacathāti. Iminā niyāmena pacantānaṃ cattāro māsā pūrayiṃsu.