Imaṃ dasavidhaṃ ovādaṃ datvā punadivase sabbā seniyo sannipātetvā rājasenāya majjhe aṭṭha kuṭumbike pāṭibhoge gahetvā "sace me dhītu gataṭṭhāne doso uppajjati, tumhehi sodhetabbo"ti vatvā navakoṭiagghanakena mahālatāpasādhanena dhītaraṃ pasādhitvā nhānacuṇṇamūlaṃ catupaṇṇāsasakaṭadhanaṃ datvā dhītāya saddhiṃ nibaddhaṃ paricāriniyo pañcasatā rūpadāsiyo pañca ājaññarathasatāni sabbaṃ sakkārañca satasataṃ datvā kosalarājānañca migāraseṭṭhiñca vissajjetvā dhītu gamanavelāya vajaṃ adhiṭṭhāyake purise pakkositvā "tātā mama dhītuyā gataṭṭhāne khīrapānatthaṃ dhenūhi, yānayojanatthaṃ usabhehi ca attho hoti, tasmā mama dhītu gamanamagge vajadvāraṃ vivaritvā puthulato aṭṭha usabhāni gogaṇena pūretvā tigāvutamattaṃ asukā nāma kandarā atthi, goyūthe taṃ ṭhānaṃ patte bherisaññāya vajadvāraṃ pidaheyyāthā"ti. Te "sādhū"ti seṭṭhissa vacanaṃ sampaṭicchitvā tathā akaṃsu. Vajadvāre vivaṭe uḷāruḷārāyeva gāviyo nikkhamiṃsu. Dvāre pidahite pana visākhāya puññabalena dammagāvo balavagāvo caṇḍagāvo ca bahi laṅghitvā maggaṃ paṭipajjiṃsu. Atha visākhā sāvatthinagaraṃ pattakāle cintesi "paṭicchannayānasmiṃ nu kho nisīditvā pavisāmi,

@2 Ma. catupaṇṇāsakoṭidhanaṃ, cha. catupaṇṇāsasakaṭasataṃ dhanaṃ

@3 Sī.,i. sahacāriniyo, cha.Ma. gamanacāriniyo