@4 cha.,i. dāsiyo 5 cha.Ma. sabbūpakārañca

@6 cha.Ma.,i. vajādhiṭṭhāyake 7 cha.Ma. tigāvutamatthake

@8 Ma. attano yūthe, cha. aggagoyūthe 9 cha.Ma. sāvatthinagaradvāraṃ Udāhu rathe ṭhatvā"ti. Athassā etadahosi "paṭicchannayānena me pavisantiyā mahālatāpasādhanassa viseso na paññāyissatī"ti. Sā sakalanagarassa attānaṃ dassentī rathe ṭhatvā nagaraṃ pāvisi. Sāvatthivāsino visākhāya sampattiṃ disvā "esā kira visākhā nāma evarūpā, ayañca sampatti etissāva anucchavikā"ti āhaṃsu. Iti sā mahāsampattiyā migāraseṭṭhino gehaṃ pāvisi. Āgatadivase cassā sakalanagaravāsino "amhākaṃ dhanañjayaseṭṭhī attano nagaraṃ sampattānaṃ mahāsakkāraṃ akāsī"ti yathāsatti yathābalaṃ paṇṇākāraṃ pahiṇiṃsu. Visākhā pahitapahitaṃ paṇṇākāraṃ tasmiṃyeva nagare aññamaññesu kulesu sabbatthakameva dāpesi. Athassā rattibhāgasamanantare ekissā ājaññavaḷavāya gabbhavuṭṭhānaṃ ahosi. Sā dāsīhi daṇḍakadīpikā gāhāpetvā tattha gantvā vaḷavaṃ uṇhodakena nhāpetvā telena makkhāpetvā attano vasanaṭṭhānameva agamāsi.

Migāraseṭṭhīpi sattāhaṃ puttassa āvāhasakkāraṃ karonto dhuravihāre vasantaṃpi tathāgataṃ manasikatvā sattame divase sakalanivesanaṃ pūrento naggasamaṇake nisīdāpetvā "āgacchatu me dhītā, arahante vandatū"ti visākhāya sāsanaṃ pahiṇi. Sā "arahanto"ti vacanaṃ sutvā sotāpannā ariyasāvikā haṭṭhatuṭṭhā hutvā tesaṃ nisīdanaṭṭhānaṃ gantvā te oloketvā "evarūpā nāma arahanto na honti, hirottappavivajjitānaṃ nāma santikaṃ kasmā maṃ sasuro pakkosāpessatī"ti "dhī dhī"ti garahitvā attano vasanaṭṭhānameva gatā. Naggasamaṇā taṃ disvā sabbe ekappahāreneva seṭṭhiṃ garahiṃsu "kiṃ tvaṃ gahapati aññaṃ nālattha, samaṇassa gotamassa sāvikaṃ mahākāḷakaṇṇiṃ kasmā imaṃ gehe pavesesi, vegena naṃ imasmā gehā nīharāhī"ti. Tato seṭṭhī "na sakkā mayā imesaṃ vacanena imaṃ gehā nīharituṃ, mahākulassa dhītā ayan"ti cintetvā "ācariyā daharā nāma jānitvā vā ajānitvā vā kareyyuṃ, tumhe