@4 Ma. hirottappavissajjitānaṃ 5 Sī.,i. nālabhittha Tuṇhī hothā"ti nagge uyyojetvā mahāpallaṅke nisīditvā suvaṇṇakaṭacchuṃ gahetvā visākhāya parivisiyamāno suvaṇṇapātiyaṃ appodakaṃ madhupāyāsaṃ paribhuñji.

Tasmiṃ samaye eko piṇḍacāriko thero piṇḍāya caranto seṭṭhissa gharadvāraṃ pāpuṇi. Visākhā taṃ disvā "sasurassa ācikkhituṃ na ayuttan"ti yathā so theraṃ passati, evaṃ apagantvā aṭṭhāsi. So pana disvāpi apassanto viya hutvā adhomukho pāyāsameva bhuñjati. Visākhā "theraṃ disvāpi me sasuro saññaṃ na karotī"ti ñatvā theraṃ upasaṅkamitvā "aticchatha bhante, mayhaṃ sasuro purāṇaṃ khādatī"ti āha. So nigaṇṭhehi tāva kathitakāle adhivāsesi, "purāṇaṃ khādatī"ti vuttakkhaṇeyeva pana hatthaṃ apanetvā "imaṃ pāyāsaṃ ito haratha, etañca imasmā gehā nīharatha. Ayaṃ hi maṃ evarūpe maṅgalagehe asucikhādakaṃ nāma karotī"ti āha. Tasmiṃ kho pana nivesane sabbepi dāsakammakarādayo visākhāya santakāva, na koci naṃ hatthe vā pāde vā gaṇhissati, mukhena kathetuṃ samatthopi nāma natthi. Tato visākhā sasurassa kathaṃ sutvā āha "tāta na ettakeneva kāraṇena mayaṃ nikkhamāma, nāhaṃ tumhehi udakatitthato kumbhadāsikā viya ānītā. Dharamānakamātāpitūnaṃ dhītaro nāma na ettakena nikkhamanti, eteneva ca me kāraṇena pitā me idhāgamanadivase aṭṭha kuṭumbike pakkosāpetvā `sace mama dhītaraṃ upādāya doso uppajjati, sodheyyāthā'ti vatvā tesaṃ hatthe maṃ ṭhapesi. Te pakkosāpetvā mayhaṃ dosādosaṃ sodhāpethā"ti āha.

Tato seṭṭhī "kalyāṇaṃ esā kathetī"ti aṭṭha kuṭumbike pakkosāpetvā "ayaṃ dārikā sattame divase paripuṇṇeyeva maṅgalagehe nisinnaṃ maṃ `asucikhādako'ti vadatī"ti āha. Evaṃ kira ammāti. "tātā mayhaṃ sasuro asuciṃ khāditukāmo bhavissati, ahaṃ pana evaṃ katvā na kathemi. Ekasmiṃ pana piṇḍapātikatthere gharadvāre ṭhite