Ayye idha doso natthi, amhākaṃ dhītā kāraṇaṃ katheti, tvaṃ kasmā kujjhasīti. Ayyā esa tāva doso mā hotu, ayaṃ pana dārikā āgatadivaseyeva mama putte saññaṃ akatvā attano icchitaṭṭhānaṃ agamāsīti. Evaṃ kira ammāti. Tātā nāhaṃ rucitaṭṭhānaṃ gacchāmi, imasmiṃ pana gehe ājānīyavaḷavāya vijātāya saññaṃpi akatvā nisīdanaṃ nāma ayuttanti daṇḍadīpikā gāhāpetvā dāsīhi parivutā tattha gantvā vaḷavāya jātaparihāraṃ kārāpesinti. Ayya amhākaṃ dhītā tāva gehe dāsīhipi akattabbakammaṃ akāsi, tvaṃ ettha kiṃ dosaṃ passasīti.

Ayyā esa tāva guṇo hotu, imissā pana pitā idhāgamanadivase ovādaṃ dento "antoaggi bahi na nīharitabbo"ti āha, kiṃ pana sakkā amhehi ubhato paṭivissakagehānaṃ aggiṃ adatvā vasitunti. Evaṃ kira ammāti. Tātā mayhaṃ pitā etaṃ aggiṃ upādāya na kathesi, yā pana antonivesane sassuādīnaṃ mātugāmānaṃ rahassakathā uppajjati, sā dāsadāsīnaṃ na kathetabbā. Evarūpā hi kathā vaḍḍhamānā kalahāya saṃvattati, idaṃ sandhāya mayhaṃ pitā kathesi tātāti.

Ayyā etaṃ tāva evaṃ hotu, imissā pitā "bāhirato aggi anto na pavesetabbo"ti āha, kiṃ sakkā amhehi antoaggimhi nibbute bāhirato aggiṃ anāharitunti. Evaṃ kira ammāti. Tātā mayhaṃ pitā etaṃ aggiṃ sandhāya na kathesi, yaṃ pana dosaṃ dāsakammakārehi kathitaṃ hoti, taṃ antomānusakānaṃ na kathetabbaṃ .pe. Yaṃpi tena "ye dadanti, tesaṃyeva dātabban"ti vuttaṃ, taṃ "yācitakaṃ upakaraṇaṃ gahetvā ye paṭidenti, tesaṃyeva dātabban"ti sandhāya vuttaṃ.