@2 cha.Ma. etampi hi me pitarā 3-3 cha.Ma. āveṇikagharāvāsaṃ vasanakālato, i. amma

@āveṇigharāvāsaṃ Datvāva khādituṃ vaṭṭatī"ti. Atha naṃ te āhaṃsu "tuyhaṃ pana mahāseṭṭhi pabbajite disvā adātabbameva ruccati maññeti. So aññaṃ paṭivacanaṃ apassanto adhomukho nisīdi.

Atha naṃ kuṭumbikā "kiṃ seṭṭhi aññopi amhākaṃ dhītu doso atthī"ti pucchiṃsu. Natthi ayyāti. Kasmā pana naṃ niddosaṃ akāraṇā gehato nīharāpesīti. Tasmiṃ khaṇe visākhā āha "paṭhamaṃ mayhaṃ sasurassa vacanena gamanaṃ na yuttaṃ, mayhaṃ pana āgamanadivase mama dosaṃ sodhanatthāya mama pitā tumhākaṃ hatthe ṭhapetvā adāsi, idāni mayhaṃ gantuṃ sukhan"ti dāsidāse "yānādīni sajjāni karothā"ti āṇāpesi. Atha naṃ seṭṭhī te kuṭumbike gahetvā "amma mayā ajānitvā kathitaṃ, khamāhi mayhan"ti āha. Tātā tumhākaṃ khamitabbaṃ tāva khamāmi, ahaṃ pana buddhasāsane aveccappasannassa kulassa dhītā, na mayaṃ vinā bhikkhusaṃghena vattāma. Sace mama ruciyā bhikkhusaṃghaṃ paṭijaggituṃ labhāmi, vasissāmīti. Amma tvaṃ yathāruciyā tava samaṇe paṭijaggāhīti.