Tato visākhā dasabalaṃ nimantāpetvā punadivase nivesanaṃ pūrentī buddhappamukhaṃ bhikkhusaṃghaṃ nisīdāpesi. Naggaparisāpi satthu migāraseṭṭhino gehaṃ gatabhāvaṃ sutvā tattha gantvā gehaṃ parivāretvā nisīdiṃsu. Visākhā dakkhiṇodakaṃ datvā "sabbo sakkāro paṭiyādito, sasuro me āgantvā dasabalaṃ parivisatū"ti sāsanaṃ pesesi. So nigaṇṭhānaṃ vacanaṃ sutvā "mama dhītā sammāsambuddhaṃ parivisatū"ti āha. Visākhā nānaggarasehi dasabalaṃ parivisitvā niṭṭhite bhattakicce puna sāsanaṃ pahiṇi "sasuro me āgantvā dasabalassa dhammakathaṃ suṇātū"ti. Atha naṃ "idāni agamanaṃ nāma ativiya akāraṇan"ti dhammakathaṃ sotukāmatāya gacchantaṃ naggasamaṇā āhaṃsu "samaṇassa gotamassa dhammaṃ suṇanto bahisāṇiyaṃ nisīditvā suṇāhī"ti. Puretarameva gantvā

Migāraseṭṭhī gantvā bahisāṇiyaṃ nisīdi. Tathāgato "tvaṃ bahisāṇiyaṃ vā nisīda, parakuḍḍe vā parasele vā paracakkavāḷe vā nisīda. Ahaṃ buddho nāma sakkomi taṃ mama saddaṃ sāvetun"ti suvaṇṇavaṇṇaṃ ambaphalaṃ rukkhakkhandhe gahetvā cālento viya dhammakathaṃ kathesi, desanāpariyosāne seṭṭhī sotāpattiphale patiṭṭhāya sāṇiṃ ukkhipitvā satthu pāde pañcapatiṭṭhitena vanditvā satthu santikeyeva ca "tvaṃ amma ajjato paṭṭhāya mama mātā"ti visākhaṃ attano mātuṭṭhāne ṭhapesi. Tato paṭṭhāya visākhā migāramātā nāma jātā.

Sā ekadivasaṃ nagare nakkhattasamaye vattante "antonagare guṇo natthī"ti dāsīhi parivutā satthu dhammakathaṃ sotuṃ gacchantī "buddhānaṃ santikaṃ uttaravesena gantuṃ ayuttan"ti mahālatāpasādhanaṃ omuñcitvā dāsiyā hatthe datvā satthāraṃ upasaṅkamitvā abhivādetvā ekamantaṃ nisīdi, satthā dhammakathaṃ kathesi. Sā satthu dhammadesanāpariyosāne dasabalaṃ vanditvā nagarābhimukhā pāyāsi. Sāpi dāsī attanāpi gahitapasādhanassa ṭhapitaṭṭhānaṃ asallakkhetvā gacchantī pasādhanatthāya paṭinivatti. Atha naṃ visākhā "kahaṃ panetaṃ ṭhapitan"ti paṭipucchi. Gandhakuṭipariveṇe ayyeti. Hotu je gantvā āhara, gandhakuṭipariveṇe ṭhapitakālato paṭṭhāya āharāpanannāma amhākaṃ ayuttaṃ. Tasmā taṃ vissajjetvā daṇḍakammaṃ karissāma. Tattha pana ṭhapite ayyānaṃ palibodho hotīti.