@4 cha.Ma. uḷuṅka..., i. ulaṅka... 5 cha.Ma.,i. carati Gopālako tassa santikaṃ gacchanto taṃ kukkuraṃ gahetvā gacchati, antarāmagge ca vāḷamigaṭṭhāne vāḷamigānaṃ palāyanatthaṃ rukkhe vā pāsāṇe vā pahāraṃ deti, sopi kukkuro tassa karaṇavidhānaṃ vavatthapesi. Athekadivasaṃ gopālako paccekabuddhassa santike nisīditvā "bhante amhākaṃ sabbakālaṃ āgamanaṃ nāma na hoti. Ayaṃ pana kukkuro cheko, imassa āgatasaññāya amhākaṃ gehadvāraṃ āgaccheyyāthā"ti āha. So ekadivasaṃ "paccekabuddhaṃ gaṇhitvā ehī"ti kukkuraṃ pesesi. So kukkuro tassa vacanaṃ sutvā bhikkhācāravelāyaṃ gantvā paccekabuddhassa pādamūle urena nipajji. Paccekabuddho "ayaṃ mama santikaṃ āgato"ti ñatvā pattacīvaraṃ ādāya maggaṃ paṭipajji. So tassa vīmaṃsanatthāya nikkhamitvā aññaṃ maggaṃ gaṇhi, kukkuro purato ṭhatvā gopālakamaggaṃ paṭipannakāle apasakki. Yasmiṃ ca ṭhāne vāḷamigānaṃ palāyanatthaṃ gopālako rukkhaṃ vā pāsāṇaṃ vā pahari, taṃ taṃ ṭhānaṃ patvā kukkuro mahāviravaṃ viravi. Tassa saddena vāḷamigā palāyanti. Paccekabuddhopi katabhattakiccavelāya mahantaṃ siniddhaṃ piṇḍaṃ tassa deti. Sopi piṇḍalobhena paccekabuddhe uttaritaraṃ sinehaṃ karoti.

Gopālako temāsaṃ vuṭṭhassa paccekabuddhassa ticīvarapahonakaṃ sāṭakaṃ katvā "bhante sace vo ruccati, idheva vasatha, no ce ruccati, yathāsukhaṃ gacchathā"ti āha. Paccekabuddho gamanākāraṃ dasseti. So gopālako paccekabuddhaṃ anugantvā nivattati. Kukkuro paccekabuddhassa aññattha gamanabhāvaṃ ñatvā sinehena uppannabalavasoko hadayaphālanaṃ patvā kālaṃ katvā tāvatiṃsapure nibbatti. Athassa paccekabuddhena saddhiṃ gamanakāle uccāsaddaṃ katvā vāḷamigānaṃ palāyitabhāvena devatāhi saddhiṃ kathentassa saddo sakaladevakulaṃ chādetvā aṭṭhāsi. So teneva nāmadheyyaṃ labhitvā ghosakadevaputto nāma jāto. Athassa tasmiṃ sampattiṃ anubhavantassa manussapathe