@7 ka. ñatvā 8 cha.Ma.,i. datvā āṇāpetvā So tattha papatanto naḷakārānaṃ kammakaraṇaṭṭhāne naḷakārasālāya patito. Sā tassa puññānubhāvena satavihatakappāsapicusamphassasadisā ahosi. Atha naṃ naḷakārajeṭṭhako "puññavā esa dārako, paṭijaggituṃ vaṭṭatī"ti gaṇhitvā gehaṃ gato. Seṭṭhī dārakassa papātato patitaṭṭhāne matabhāvaṃ vā amatabhāvaṃ vā pariyesāpento naḷakārajeṭṭhakena gahitabhāvaṃ ñatvā tassapi sahassaṃ datvā āṇāpesi.

Aparabhāge seṭṭhissa sakaputtopi sopi ubho vayappattā ahesuṃ. Seṭṭhī puna ghosakadārakassa maraṇupāyaṃ cintento attano kumbhakārassa gehaṃ gantvā "ambho mayhaṃ gehe evarūpo eko avajātadārako atthi, taṃ dārakaṃ yaṅkiñci katvā māretuṃ vaṭṭatīti rahassena āha. So ubhopi kaṇṇe pidahitvā "evarūpaṃ nāma bhāriyaṃ kathaṃ kathetuṃ na vaṭṭatī"ti āha. Tato seṭṭhī "ayaṃ mudhā na karissatī"ti cintetvā "handa bho sahassaṃ gaṇhitvā etaṃ kammaṃ nipphādehī"ti āha. Lañco nāma abhinnaṃ bhindati, tasmā so sahassaṃ labhitvā sampaṭicchitvā "ahaṃ ayya asukadivase nāma āvāpaṃ ālimpessāmi, tadā taṃ dārakaṃ asukadivase asukavelāya nāma pesehī"ti āha. Seṭṭhīpi kho tassa vacanaṃ sampaṭicchitvā tato paṭṭhāya divase gaṇento kumbhakārena vuttadivasassa sampattabhāvaṃ ñatvā ghosakakumāraṃ pakkosāpetvā "amhākaṃ tāta asukadivase nāma bahūhi bhājanehi attho, tvaṃ amhākaṃ kumbhakārassa santikaṃ gantvā `pitarā kira me tumhākaṃ ekaṃ kathitaṃ atthi, taṃ ajja nipphādehī'ti vadā"ti. So "sādhū"ti tassa vacanaṃ sampaṭicchitvā nikkhami.

Atha naṃ antarāmagge seṭṭhissa sakaputto guḷakīḷikaṃ kīḷanto disvā vegena gantvā "ahaṃ bhātika dārakehi saddhiṃ kīḷanto ettakaṃ nāma jito, taṃ ne