Sopi kho kumāro taṃdivasaṃ tattha vasitvā punadivase seṭṭhiṃ āpucchitvā kammantikassa gāmaṃ gantvā paṇṇaṃ adāsi. Kammantiko paṇṇaṃ vācetvā gāmike sannipātetvā "tumhe ca mama na gaṇetha, mama sāmī attano jeṭṭhakaputtassa sabbasatena dārikaṃ ānetūti mayhaṃ santikaṃ pesesi, vegena imasmiṃ ṭhāne uppādaṃ sampiṇḍethā"ti sabbaṃ maṅgalasakkāraṃ sajjetvā gāmikaseṭṭhissa sāsanaṃ pesetvā sampaṭicchāpetvā sabbasatena maṅgalakiriyaṃ niṭṭhāpetvā kosambikaseṭṭhissa paṇṇaṃ pahiṇi "mayā tumhehi pahitapaṇṇe sāsanaṃ sutvā idañca idañca katan"ti.

Seṭṭhī taṃ sāsanaṃ sutvā aggidaḍḍho viya "idāni naṭṭhomhī"ti cintanavasena lohitapakkhandikarogaṃ patvā "yena kenaci taṃ upāyena pakkosāpetvā mama santakassa assāmikaṃ karissāmī"ti "maṅgalassa niṭṭhitakālato paṭṭhāya kasmā mayhaṃ putto bahi hoti, sīghaṃ āgacchatū"ti sāsanaṃ pesesi. Sāsanaṃ sutvā kumāre gantuṃ āraddhe seṭṭhidhītā cintesi "ayaṃ bālo `maṃ nissāya ayaṃ sampatti laddhā'ti na jānāti, yaṅkiñci katvā imassa gamanapaṭibāhanupāyaṃ kātuṃ vaṭṭatī"ti. Tato naṃ āha "kumāra mā ativegena gacchāhi, kulagāmaṃ gacchantena nāma attano parivacchaṃ katvā gantuṃ vaṭṭatī"ti.

@4 cha.,i. ānetuṃ 5 ka. aggimhi daḍḍho 6 cha.,i. pakkositvā