@7-7 Sī.,i. kumāro gantuṃ āraddho 8 Sī.,i. kaṃ 9-9 cha.Ma.,i. imaṃ sampattiṃ

@alatthanti 10 cha.Ma.,i. gamanapaṭibāhanupāyo 11 Sī. mā ativegāyi

Kosambikaseṭṭhīpi tassa cirāyanabhāvaṃ ñatvā puna sāsanaṃ pahiṇi "kasmā me putto cirāyati, ahaṃ lohitapakkhandikarogaṃ patto, jīvantameva maṃ āgantvā daṭṭhuṃ vaṭṭatī"ti. Tasmiṃ kāle seṭṭhidhītā tassa ārocesi "na eso tava pitā, tvaṃ pana `pitā'ti saññaṃ karosi. Esa tava māraṇatthāya kammantikassa paṇṇaṃ pahiṇi, ahaṃ taṃ paṇṇaṃ apanetvā aññaṃ sāsanaṃ likhitvā tava etaṃ sampattiṃ uppādayiṃ. Esa taṃ `aputtaṃ karissāmī'ti pakkosati, etassa kālakiriyaṃ āgamehī"ti. Athassa dharamānena agantvā tassa dubbalabhāvaṃ sutvā kosambinagaraṃ agamāsi. Seṭṭhidhītāpi tassa bahiyeva saññaṃ adāsi "tvaṃ pavisanto sakalagehe tava ārakkhaṃ ṭhapentova pavisā"ti. Sayaṃpi seṭṭhiputtena saddhimeva pavisitvā ubho hatthe ukkhipitvā rodantī viya hutvā andhakārakaṭṭhāne nipannakassa seṭṭhissa santikaṃ gantvā sīseneva hadayaṃ pahari. So dubbalatāya teneva pahārena kālamakāsi.

Kumāro pitu sarīrakiccaṃ katvā "tumhe mahāseṭṭhissa maṃ sakaputtoti vadathā"ti pādamūlikānaṃ lañcaṃ adāsi. Tato sattame divase rājā "seṭṭhiṭṭhānārahaṃ ekaṃ laddhuṃ vaṭṭatī"ti "seṭṭhissa saputtanipputtabhāvaṃ jānāthā"ti pesesi. Seṭṭhipādamūlikā rañño seṭṭhissa saputtabhāvaṃ kathayiṃsu. Rājā "sādhū"ti sampaṭicchitvā tassa seṭṭhiṭṭhānaṃ adāsi. So ghosakaseṭṭhī nāma jāto. Atha naṃ bhariyā āha "ayyaputta tvaṃpi avajāto, mayaṃpi duggatakule nibbattā. Pubbe katakusalavasena pana evarūpaṃ sampattiṃ labhimhā, adhunāpi kusalaṃ karissāmā"ti. So "sādhu bhadde"ti sampaṭicchitvā devasikaṃ sahassaṃ vissajjetvā dānaṃ paṭṭhapesi.