Tato naṃ āha "tvaṃ amma kasmā sesajano viya gaṇhitvā na gacchasī"ti. Tāta evarūpaṃ sambādhaṭṭhānaṃ kinti katvā pavisissāmīti. Amma kati pana janā tumheti. Tayo janā tātāti. So tayo bhattapiṇḍe adāsi. Sā taṃ bhattaṃ mātāpitūnaṃ adāsi, pitā dīgharattaṃ chātakajjhatto atirekaṃ bhuñjitvā kālamakāsi. Sā punadivase gantvā dveyeva bhattapiṇḍe gaṇhi. Taṃdivasaṃ seṭṭhibhariyā bhattena ca kilantatāya seṭṭhino ca maraṇasokena rattibhāgasamanantare kālamakāsi. Punadivase

@5 cha.,i. macchavilope 6 cha.Ma.,i. pavisāmīti 7 cha.Ma. chātakattā, i. chātajjhatto Seṭṭhidhītā ekameva bhattapiṇḍaṃ gaṇhi. Dānakammiko tassā kiriyaṃ upadhāretvā "amma tayā paṭhamadivase tayo piṇḍā gahitā, punadivase dve, ajja ekameva gaṇhasi. Kiṃ nu kho kāraṇan"ti pucchi. Sā taṃ kāraṇaṃ kathesi. Kataragāmavāsino pana amma tumheti. Sā taṃpi kāraṇaṃ nippadesato kathesi. "amma evaṃ sante tvaṃ amhākaṃ seṭṭhidhītā nāma ahosi, mayhañca aññā dārikā natthi, tvaṃ ito paṭṭhāya mama dhītā ammā"ti taṃ dhītaraṃ katvā gaṇhi.

Sā uṭṭhāya samuṭṭhāya dānagge mahāsaddaṃ sutvā "kasmā ayaṃ tāta uccāsaddamahāsaddo"ti āha. Amma mahājanassa antare nāma appasaddaṃ kātuṃ na sakkāti. Ahamettha upāyaṃ jānāmi tātāti. Kiṃ kātuṃ vaṭṭati ammāti. Samantā vatiṃ katvā dve dvārāni yojetvā anto bhājanāni ṭhapāpetvā ekena dvārena pavisitvā bhattaṃ gaṇhitvā ekena dvārena nikkhamanaṃ karotha tātāti. So sādhu ammāti, punadivasato paṭṭhāya tathā kāresi. Tato paṭṭhāya dānaggaṃ vūpasamanaṃ viya sannisinnasaddaṃ ahosi.