Athekadivasaṃ udeno rājā nagaraṃ anusañcaranto taṃ sāmāvatiṃ tāhi kumārīhi parivāritaṃ kīḷamānaṃ disvā "kassāyaṃ dārikā"ti pucchitvā "ghosakaseṭṭhissa dhītā"ti sutvā assāmikabhāvaṃ pucchi. Tato assāmikabhāve kathite "gacchatha seṭṭhino kathetha `tumhākaṃ dhītaraṃ rājā icchatī"ti. Taṃ sutvā seṭṭhī "amhākaṃ aññā dārikā natthi, ekadhītikaṃ sappativāsena dātuṃ na sakkomā"ti. Rājā taṃ kathaṃ sutvā seṭṭhiñca bhariyañca bahi katvā sakalagehaṃ lañchāpesi. Sāmāvatī bahi kīḷitvā āgacchantī mātāpitaro bahi nisinnake disvā "ammatātā kasmā idha nisīdathā"ti āha. Te taṃ kāraṇaṃ kathayiṃsu. Ammatātā kasmā tumhe imaṃ paṭivacanaṃ rājānaṃ na vadetha "mama dhītā sappativāsena vasantī ekikā vasituṃ na sakkhissati, sacassā parivārā pañcasatā kumāriyo vasāpetha, evaṃ vasatī"ti. Idānipi evaṃ kathāpetha tātāti. "sādhu amma mayaṃ tava cittaṃ na jānimhā"ti āha. Te tathā kathayiṃsu. Rājā uttaritaraṃ pasīditvā "sahassaṃpi hotu, sabbā ānethā"ti āha. Atha naṃ bhaddakena nakkhattamuhuttakena pañcamātugāmasataparivāraṃ rājagahaṃ nayiṃsu. Rājā tā pañcasatāpi tassāyeva parivāraṃ katvā abhisekaṃ katvā ekasmiṃ pāsāde vasāpesi.

Tena ca samayena kosambiyaṃ ghosakaseṭṭhī kukkuṭaseṭṭhī pāvārikaseṭṭhīti seṭṭhinova tayo janā aññamaññaṃ sahāyakā honti. Te tayopi janā pañcasate tāpase paṭijagganti. Tāpasāpi cattāro māse tesaṃ santike vasitvā aṭṭha māse himavante vasanti. Athekadivasaṃ te tāpasā himavantato āgacchantā mahākantāre pipāsitā

@4 cha.ma,i. sassāmikaassāmikabhāvaṃ 5 cha.Ma.,i. sapattivāse