@4 cha.Ma. tato te, i. tato 5 cha.Ma. nāgarāpi 6 cha.Ma.,i. parivisāmi

@7 cha.Ma. muccissatīti Khujjuttarā attanā laddhaṃ bhojanaṃ bhuñjitvā buddhānaṃ bhattagge veyyāvaccaṃ akāsi. Sā satthārā upanisinnakathāvasena kathitaṃ dhammaṃ sabbameva uggaṇhi. Anumodanaṃ pana sutvā sotāpattiphale patiṭṭhāsi.

Sā aññesu divasesu cattārova kahāpaṇe datvā pupphāni gahetvā gacchati, tasmiṃ pana divase diṭṭhasaccabhāvena parasantake cittaṃ anuppādetvā sabbeva aṭṭha kahāpaṇe datvā pacchiṃ pūretvā pupphāni ādāya sāmāvatiyā santikaṃ agamāsi. Atha naṃ sā pucchi "amma uttare tvaṃ aññesu divasesu na bahūni pupphāni āharasi, ajja pana bahukāni, kinno rājā uttaritaraṃ pasanno"ti. Sā musāvādena abhabbatāya atīte attanā kataṃ anigūhitvā sabbaṃ kathesi. "atha kasmā ajja bahūni āharasī"ti vuttā ca evamāha "ahaṃ ajja dasabalassa dhammaṃ sutvā amataṃ sacchākāsiṃ, tasmā tumhe na vañcemī"ti. Taṃ sutvā "amma uttare tayā laddhaṃ amatadhammaṃ amhākaṃpi dehī"ti sabbāva hatthaṃ pasārayiṃsu. Ayye evaṃ dātuṃ na sakkā, ahaṃ pana satthārā kathitaniyāmena tumhākaṃ dhammaṃ desissāmi, tumhe attano sotamhi patitaṃ dhammaṃ labhissathāti. Tenahi amma uttare kathehīti. "evaṃ kathetuṃ na sakkā, mayhaṃ uccaṃ āsanaṃ paññāpetvā tumhe nīcāsanesu nisīdathā"ti āha. Tā pañcasatāpi itthiyo khujjuttarāya uccāsanaṃ datvā sayaṃ nīcāsanaṃ gahetvā nisīdiṃsu. Khujjuttarāpi sekkhapaṭisambhidāsu ṭhatvā tāsaṃ dhammaṃ desesi. Desanāpariyosāne sāmāvatiṃ jeṭṭhikaṃ katvā sabbāva sotāpattiphale patiṭṭhahiṃsu. Tato paṭṭhāya khujjuttaraṃ veyyāvaccakaraṇato apanetvā "tvaṃ satthu dhammakathaṃ sutvā āharitvā amhe sāvehī"ti āhaṃsu. Khujjuttarāpi tato paṭṭhāya tathā akāsi.