Athakho tā sāmāvatiyā parivārā pañcasatā itthiyo paṭividdhasaccāpi samānā rañño assaddhabhāvena kālena kālaṃ satthu santikaṃ gantvā buddhadassanaṃ na labhanti. Tasmā dasabale antaravīthiṃ paṭipanne vātāpānesu appahontesu attano attano gabbhesu chiddaṃ katvā tehi olokenti. Athekadivasaṃ māgaṇḍiyā attano pāsādatalato nikkhamitvā caṅkamamānā tāsaṃ vasanaṭṭhānaṃ gantvā gabbhachiddaṃ disvā "kimidan"ti pucchitvā tāhi tassā satthari baddhāghātataṃ ajānantīhi "satthā imaṃ nagaraṃ āgato, mayaṃ ettha ṭhatvā satthāraṃ passāma ceva pūjema cā"ti vutte "idānissa kattabbaṃ jānissāmi, imāpi tassa upaṭṭhāyikā, imāsaṃpi kattabbaṃ jānissāmī"ti cintetvā gantvā rañño ārocesi "mahārāja sāmāvatimissakānaṃ bahiddhā paṭṭhanā atthi, katipāhāvasāneva te jīvitaṃ māressanti, sāmāvatī saparivārā tumhesu sinehaṃ vā pemaṃ vā na karoti, samaṇaṃ pana gotamaṃ antaravīthiyā gacchantaṃ disvā vātapānesu appahontesu tāni khaṇḍetvāpi okāsaṃ katvā olokentī"ti āha. Rājā "na tā evarūpaṃ karissantī"ti na saddahi. Puna vuttepi na saddahiyeva. Atha naṃ tikkhattuṃ vuttepi asaddahantaṃ "sace na saddahasi, tāsaṃ vasanaṭṭhānaṃ

@katvā olokenti 4 cha.Ma. pucchi 5 cha.Ma. raññā saddhiṃ rahogatakāle

@6 cha.Ma. katipāheneva 7 cha.Ma. sace me vacanaṃ na saddahasi Gantvā upadhārehi mahārājā"ti āha. Rājā gantvā gabbhesu chiddaṃ disvā "idaṃ kin"ti pucchitvā tasmiṃ atthe ārocite tāsaṃ akujjhitvā kiñci avatvā chiddāni pidahāpesi. Rājā tato paṭṭhāya tāsaṃ pāsāde chiddakajālavātapānāni kāresi.