Sā tena kāraṇena rājānaṃ kopetuṃ asakkontī "deva etāsaṃ tumhesu pemaṃ atthi vā natthi vāti jānissāma, aṭṭha kukkuṭe pesetvā tumhākaṃ atthāya pacāpethā"ti āha. Rājā tassā vacanaṃ sutvā "ime pacitvā pesetū"ti sāmāvatiyā aṭṭha kukkuṭe pahiṇi. Sotāpannā ariyasāvikā jīvamāne kukkuṭe kiṃ pacessati, alanti vatvā puna hatthenapi phusituṃ na icchi. Māgaṇḍiyā "hotu mahārāja, eteyeva kukkuṭe samaṇassa gotamassa pacanatthāya pesehī"ti. Rājā tathā akāsi. Māgaṇḍiyā antarāmaggeyeva te kukkuṭe mārāpetvā "ime kukkuṭe pacāpetvā samaṇassa gotamassa detū"ti pahiṇi. Sā tathāsaññībhāvena dasabalañca uddissa pahitabhāvena pacitvā dasabalassa pesesi. Māgaṇḍiyā "passa mahārājā"ti vatvā ettakenapi rājānaṃ kopetuṃ nāsakkhi.

Ayaṃ pana udeno tāsu ekekissā vasanaṭṭhāne satta satta divasāni vasi. Athāyaṃ māgaṇḍiyā ekaṃ kaṇhasappapotakaṃ veṇupabbe pakkhipāpetvā attano vasanaṭṭhāne ṭhapesi. Raññopi yattha katthaci gacchantassa hatthikantavīṇaṃ ādāyeva gamanaṃ āciṇṇaṃ, māgaṇḍiyā rañño attano santikaṃ āgamanakāle taṃ sappapotakaṃ antovīṇāyaṃ pakkhipitvā chiddaṃ pidahāpesi. Atha naṃ sāmāvatiyā santikaṃ gamanakāle "mahārāja sāmāvatī nāma samaṇassa gotamassa pakkhā, tumhe na gaṇeti, yaṅkiñci katvā tumhākaṃ dosameva cinteti, appamattā hothā"ti āha. Rājā sāmāvatiyā vasanaṭṭhānampatto sattāhaṃ vītināmetvā puna sattāhe māgaṇḍiyāya nivesanaṃ

@matabhāvena 4 cha.Ma. veḷupabbe 5 cha.Ma.,i. rañño ca 6 cha.Ma.,i. vasanaṭṭhāne sattāhaṃ