@vītināmetvā Agamāsi. Sā tasmiṃ āgacchanteyeva "kacci te mahārāja sāmāvatī otāraṃ na gavesatī"ti kathentī viya rañño hatthato vīṇaṃ gahetvā cāletvā "kiṃ nu kho mahārāja ettha abbhantare vicaratī"ti vatvā sappassa nikkhamanokāsaṃ katvā "abbhumme anto sappo"ti vīṇaṃ chaḍḍetvā palāyi. Tasmiṃ kāle rājā padittaveḷuvanaṃ viya pakkhittaloṇaṃ uddhanaṃ viya ca rosena taṭataṭāyanto "vegena saparivāraṃ sāmāvatiṃ pakkosathā"ti āha. Rājapurisā gantvā pakkosiṃsu.

Sā rañño kuddhabhāvaṃ ñatvā sesamātugāmānaṃ saññamadāsi. "rājā tumhe ghātetukāmo pakkosati, ajja divasaṃ odissakena mettāpharaṇena rājānaṃ pharathā"ti āha. Rājā tā itthiyo pakkosāpetvā sabbāva paṭipāṭiyā ṭhapetvā mahādhanuṃ ādāya visapītaṃ kaṇḍaṃ sannayhitvā dhanuṃ pūretvā aṭṭhāsi. Tasmiṃ khaṇe sabbāva tā sāmāvatippamukhā itthiyo odhiso mettaṃ phariṃsu. Rājā kaṇhaṃ neva khipituṃ na apanetuṃ sakkoti, gattehi sedā mucciṃsu, sarīraṃ vedhati, mukhato kheḷo savati, gahetabbagahaṇaṃ na passati. Atha naṃ sāmāvatī "kiṃ mahārāja kilamasī"ti āha. Āma devi kilamāmi, avassayo me hohīti. Sādhu mahārāja kaṇḍaṃ mahāpaṭhavimukhaṃ karohīti. Rājā tathā akāsi. Sā "rañño hatthato kaṇḍaṃ muccatū"ti adhiṭṭhāsi. Tasmiṃ khaṇe kaṇḍaṃ mucci. Rājā taṃkhaṇaṃyeva udake nimujjitvā āgamma allakeso allavattho sāmāvatiyā pādesu patitvā "khama devi mayhaṃ, bhedakānameva vacanena anupadhāretvā etaṃ katan"ti āha. Khamāmi devāti. Sādhu devi, etaṃ tayā mayhaṃ khamitaṃ nāma hoti. Rājā ito paṭṭhāya tumhākaṃ yathāruciyā dasabalassa dānaṃ detha, pacchābhattaṃ vihāraṃ gantvā dhammakathaṃ suṇātha, ajjato paṭṭhāya parihāraṃ dammīti. Tenahi deva ajjato paṭṭhāya ekaṃ bhikkhuṃ yācitvā ānetha, yo no dhammaṃ vācessatīti. Rājā satthu santikaṃ gantvā yācanto ānandattheraṃ yāci.