@4 cha.Ma. papphoṭetvā, i. phoṭetvā 5 cha.Ma. raññā 6 cha.Ma.,i. appitaṃ

@7 cha.,i. puṇṇasīhassa

Athekasmiṃ nakkhattamahadivase rājagahaseṭṭhī puṇṇaṃ pakkosāpetvā āha "tāta puṇṇa nakkhattaṃ vā. Uposatho vā duggatassa kiṃ karissati, evaṃ santepi vadehi `kiṃ nakkhattapariccayaṃ gahetvā nakkhattaṃ kīḷissasi, balavagoṇe ca phālañca naṅgalañca gahetvā karissasī"ti. "mama bhariyāya saddhiṃ mantetvā jānissāmi ayyā"ti taṃ bhariyāya ārocesi. "seṭṭhī nāma ayyo issaro, tassa tayā saddhiṃ kathentassa kathā sobhati, tvaṃ pana attano kasikammaṃ mā vissajjesī"ti āha. So tassā vacanaṃ sutvā kasikabhaṇḍaṃ ādāya kasituṃ gato.

Taṃdivasañca sāriputtatthero nirodhasamāpattito vuṭṭhāya "kassa ajja mayā saṅgahaṃ kātuṃ vaṭṭatī"ti āvajjento imassa puṇṇassa upanissayaṃ disvā bhikkhācāravelāya pattacīvaramādāya puṇṇassa kasanaṭṭhānaṃ gacchanto avidūre attānaṃ dassesi. Puṇṇo theraṃ disvā kasiṃ ṭhapetvā therassa santikaṃ gantvā pañcapatiṭṭhitena vandi. Thero taṃ oloketvā udakasabhāgaṃ pucchi. Tassa etadahosi "ayyo mukhaṃ dhovitukāmo bhavissatī"ti. Tato vegena gantvā dantakaṭṭhaṃ āharitvā kappiyaṃ katvā therassa adāsi. There dantakaṭṭhaṃ khādante pattena saddhiṃ dhammakarakaṃ nīharitvā udakassa pūretvā āhari. Thero mukhaṃ dhovitvā bhikkhācāramaggaṃ paṭipajji. Puṇṇo cintesi "thero na aññesu divasesu imaṃ maggaṃ paṭipajjati, ajja pana mayhaṃ saṅgahatthāya paṭipanno bhavissati. Aho vata me bhariyā mamatthāya āharaṇakaāhāraṃ therassa patte patiṭṭhapeyyā"ti.