Athassa sā bhariyā "ajja nakkhattadivaso"ti pātova attano labhanakaniyāmena khādanīyaṃ bhojanīyaṃ saṃvidhāya gahetvā sāmikassa kasanaṭṭhānaṃ āgantvā antarāmagge theraṃ disvā cintesi "aññesu divasesu mayhaṃ theraṃ disvā deyyadhammo na hoti,

@4 cha.Ma. dhammakaraṇaṃ 5 Sī.,i. bhikkhācāravelāya maggaṃ 6 Ma. gantvā, cha. āgacchantī Deyyadhamme santepi mama ayyaṃ na passāmi, ajja pana dvinnaṃpi sammukhībhāvo jāto. Mama sāmikassa pana sampādetvā āharissāmi, imaṃ tāva āhāraṃ therassa dassāmī"ti tīhi cetanāhi sampayuttaṃ katvā taṃ bhojanaṃ sāriputtattherassa patte patiṭṭhapetvā "evamidha duggatajīvitā muccāmī"ti āha. Theropi "tava ajjhāsayo pūratū"ti tassānumodanaṃ katvā tato nivattitvā vihāraṃ agamāsi.

Sāpi puna attano gehaṃ gantvā sāmikassa āhāraṃ sampādetvā ādāya kasanaṭṭhānaṃ gantvā sāmikassa kujjhanabhāvato bhītā "sāmi ajja ekadivasaṃ tava manaṃ sandhārehī"ti āha. Kiṃkāraṇāti. Ahaṃ ajja tāva āhāraṃ āharantī antarāmagge theraṃ disvā tava bhāgabhattaṃ therassa patte patiṭṭhapetvā puna gehaṃ gantvā āhāraṃ pacitvā ādāya āgatamhīti. Manāpaṃ te bhadde kataṃ, mayāpi pātova therassa dantakaṭṭhañca mukhodakañca dinnaṃ. Ajja amhākaṃ samabhāgaṃ sabbaṃpi therassa amhākaṃ santakameva jātanti dvinnaṃpi janānaṃ ekasadisameva cittaṃ ahosi. Atha puṇṇo āhārakiccaṃ katvā bhariyāya ūrumhi sīsaṃ katvā muhuttaṃ nipajji. Athassa niddā okkami. So thokaṃ niddāyitvā pabuddho kasitaṭṭhānaṃ olokesi, olokitolokitaṭṭhānaṃ mahākosātakīpupphehi sampuṇṇaṃ viya ahosi. So bhariyaṃ āha "bhadde kiṃ nāmetaṃ ajja imaṃ kasitaṭṭhānaṃ suvaṇṇaṃ hutvā khāyatī"ti. Ayya ajja te sakaladivase kilantatāya akkhīni maññe bhamantīti. Bhadde mayhaṃ asaddahantī sayaṃ olokehīti. Tasmiṃ kāle sā oloketvā sabhāvaṃ ayya kathesi, evametaṃ bhavissatīti.