Sakaṭehi saddhiṃ gatarājapurisā "rañño puññan"ti vatvā suvaṇṇapiṇḍaṃ gaṇhanti, taṃ gahitaṃ kasitaleḍḍuṃyeva hoti. Te gantvā rañño ārocesuṃ. Tenahi bhaṇe gantvā "puṇṇassa puññan"ti vatvāva gaṇhathāti. Gahitaṃ suvaṇṇameva hoti. Te sabbasuvaṇṇaṃ āharitvā rājaṅgaṇe rāsiṃ akaṃsu. Rāsī ubbedhena tālappamāṇo ahosi. Rājā vāṇije pakkosāpetvā "kassa gehe ettakaṃ suvaṇṇaṃ atthī"ti pucchi. Natthi deva kassacīti. Ettakassa pana dhanassa sāmino kiṃ kātuṃ vaṭṭatīti. Dhanaseṭṭhiṃ nāma naṃ kātuṃ vaṭṭati devāti. Tenahi puṇṇaṃ imasmiṃ nagare dhanaseṭṭhiṃ nāma kārethāti sabbantaṃ suvaṇṇaṃ tasseva datvā taṃdivasaṃyeva seṭṭhiṭṭhānaṃ adāsi. So seṭṭhī maṅgalaṃ karonto sattāhaṃ buddhappamukhassa bhikkhusaṃghassa dānaṃ adāsi. Sattame divase dasabalassa bhattānumodanāya puṇṇaseṭṭhīpi bhariyāpi dhītāpi sabbe sotāpattiphale patiṭṭhahiṃsu.

Aparabhāge rājagahaseṭṭhī "puṇṇaseṭṭhino vayappattā dārikā atthī"ti sutvā attano puttassa kāraṇā tassa gehe pesesi. So tassa vacanaṃ sutvā "nāhaṃ dhītaraṃ dassāmī"ti paṭisāsanaṃ pesesi. Sumanaseṭṭhīpi puna pesesi "tvaṃ mama gehaṃ

@2 cha.Ma.,i. suvaṇṇapiṇḍe 3-3 cha.Ma.,i. gahitagahitampi kasitaleḍḍuyeva