@pahiṇissāmīti, cha.Ma. gehaṃ na pesessāmīti 4 Sī.,i. mā maddatu

@5 cha.Ma.,i. cārake 6 cha.,i. ettake addhāne

Sā tena sampaṭicchitabhāvaṃ ñatvā divase divase pātova dāsīgaṇaparivutā satthu sahatthā khādanīyaṃ bhojanīyaṃ saṃvidahitvā satthari bhattakiccaṃ katvā vihāraṃ gate uposathaṅgāni adhiṭṭhāya pāsādavaraṃ āruyha attano sīlāni āvajjamānā nisīdi. Evaṃ aḍḍhamāsaṃ vītināmetvā uposathavissajjanadivase pātova yāgukhajjakādīna saṃvidahantī vicarati. Tasmiṃ samaye seṭṭhiputto sirimāya saddhiṃ uparipāsādavaragato jālavātapānaṃ vivaritvā antaravatthuṃ olokento aṭṭhāsi. Uttarā vātapānachiddena uddhaṃ olokesi. Seṭṭhiputto uttaraṃ oloketvā "nerayikajātikā vata ayaṃ evaṃvidha nāma sampattiṃ pahāya ukkhalimasimakkhitā hutvā nikkāraṇā dāsīnaṃ antare vicaratī"ti hasitaṃ akāsi. Uttarā tassa pamādabhāvaṃ ñatvā "ayaṃ bālo nāma attano sampatti sabbakālaṃ thāvarāti saññī bhavissatī"ti sayaṃpi hasitaṃ akāsi. Tato sirimā "ayaṃ petikā mayi ṭhitāya evaṃ mama sāmikena saddhiṃ hasitaṃ karotī"ti kupitā vegena otari. Uttarā tassā gamanākappeneva "ayaṃ bālā aḍḍhamāsamattaṃ imasmiṃ gehe vasitvā mayhamevetaṃ gehantisaññī jātā"ti vatvā taṃkhaṇaññeva mettajjhānaṃ samāpajjitvā aṭṭhāsi. Sirimāpi dāsīnaṃ antare āgantvā ulluṅkaṃ gahetvā pūvapacanaṭṭhāne pakkuṭṭhitatelassa pūretvā uttarāya matthake āsiñci, mettajjhānassa vipphārena uttarāya matthake āsittaṃ pakkuṭṭhitatelaṃ padumapatte āsittaudakaṃ viya vinivaṭṭitvā gataṃ.