Athekadivasaṃ dhammassavanatthāya vihāraṃ gatā vihāracārikañcaramānā ekaṃ bhikkhuṃ gilānaṃ disvā abhivādetvā paṭisaṇṭhāraṃ katvā "ayyassa kiṃ laddhuṃ vaṭṭatī"ti pucchi. Rasaṃ laddhuṃ vaṭṭati upāsiketi. "hotu bhante, ahaṃ pahiṇissāmī"ti theraṃ abhivādetvā antonagaraṃ gantvā punadivase pavattamaṃsatthāya dāsiṃ antarāpaṇaṃ pesesi. Sā sakalanagare pavattamaṃsaṃ alabhitvā aladdhabhāvaṃ kathesi. Upāsikā cintesi "ahaṃ ayyassa rasaṃ pahiṇissāmīti vatvā sace na pesessāmi, ayyo aññatopi

Satthā taṃ kāraṇaṃ ñatvā punadivase bhikkhācāravelāya bhikkhusaṃghaparivuto upāsikāya gehaṃ agamāsi. Sā tathāgatassa āgatabhāvaṃ sutvā sāmikaṃ āmantesi "ayyaputta ahaṃ satthu santikaṃ gantuṃ na sakkomi, gaccha tvaṃ satthāraṃ antogehaṃ pavesetvā nisīdāpehī"ti. So tathā akāsi. Satthā "kahaṃ suppiyā"ti āha. Gilānā bhanteti. Pakkosatha nanti. Atha te gantvā "satthā taṃ pakkosatī"ti āhaṃsu. Sā cintesi "sabbalokassa hitānukampako satthā me kāraṇaṃ disvā pakkosāpessatī"ti sahasā mañcamhā uṭṭhāsi. Athassā buddhānubhāvena taṃkhaṇaṃyeva vaṇo ruhitvā suñchavī ahosi sesaṭṭhānato atirekataraṃ vippasannavaṇṇo. Tasmiṃ khaṇe upāsikā sitaṃ katvā dasabalaṃ pañcapatiṭṭhitena vanditvā ekamantaṃ nisīdi. Satthā "imissā upāsikāya kiṃ aphāsukan"ti pucchi. Sā attanā katakāraṇaṃ sabbaṃ kathesi. Satthā katabhattakicco vihāraṃ gantvā bhikkhusaṃghaṃ sannipātetvā taṃ bhikkhuṃ anekapariyāyena vigarahitvā sikkhāpadaṃ paññapesi. Evametaṃ vatthu samuṭṭhitaṃ. Aparabhāge satthā jetavane nisinno upāsikāyo paṭipāṭiyā ṭhānantaresu ṭhapento suppiyaṃ upāsikaṃ gilānupaṭṭhākīnaṃ aggaṭṭhāne ṭhapesīti.