@8 Sī. dullabhavacanaṃ, i. dullabhasavanaṃ, cha.Ma. dullabhassavanaṃ "iminā ajjhāsayena ṭhitāya nāma gehe bhaṇḍaṃ harantehi amhehi mahāpaṭhavī pavisitabbā bhaveyyā"ti. So tāvadeva gantvā corehi gahitabhaṇḍaṃ chaḍḍāpetvā corehi saddhiṃ āgantvā dhammaṃ suṇanto parisapariyante aṭṭhāsi. Kātiyānīpi upāsikā therassa desanāpariyosāne sotāpattiphale patiṭṭhāsi.

Atha aruṇe uggate corajeṭṭhako gantvā upāsikāya pādesu patitvā "ayye sabbesaññeva no khamāhī"ti āha. Kiṃ pana tumhehi mayhaṃ katanti. So sabbaṃ attanā kataṃ dosaṃ ārocesi. Tenahi tātā khamāmi tumhākanti. Ayye amhākaṃ evaṃ khamitaṃ nāma na hoti, tumhākaṃ pana puttattherassa santike sabbesaṃyeva no pabbajjaṃ dāpehīti. Sā sabbepi te gahetvā kuṭikaṇṇasoṇattherassa santike pabbājesi. Tepi kho corā therassa santike pabbajitvā sabbeva arahattaṃ pāpuṇiṃsu. Evametaṃ vatthuṃ samuṭṭhitaṃ. Athassā aparabhāge satthā jetavane viharanto upāsikāyo ṭhānantaresu ṭhapento kātiyānīupāsikaṃ aveccappasannānaṃ aggaṭṭhāne ṭhapesīti.

Nakulamātāvatthu

[266] Navame vissāsikānanti vissāsakathaṃ kathentīnaṃ upāsikānaṃ nakulamātā gahapatānī aggāti dasseti. Yaṃ panettha vattabbaṃ, taṃ sabbaṃ heṭṭhā upāsakapāliyaṃ vuttanayameva. Kevalaṃ idha nakulamātaraṃ dhuraṃ katvā veditabbanti.