Uppannoti jāto sañjāto nibbatto abhinibbatto pātubhūto. Bhiyyobhāvāyāti punappunaṃ bhāvāya. Vepullāyāti vipulabhāvāya rāsibhāvāya. Tattha sakiṃ uppanno kāmacchando na nirujjhissati, sakiṃ niruddho vā sveva puna uppajjissatīti aṭṭhānametaṃ. Ekasmiṃ pana niruddhe etasmiṃ vā ārammaṇe aññatarasmiṃ vā ārammaṇe aparāparaṃ uppajjamāno bhiyyobhāvāya vepullāya saṃvattati nāma.

Subhanimittanti rāgaṭṭhāniyaṃ ārammaṇaṃ. "sanimittā bhikkhave uppajjanti pāpakā akusalā dhammā, no animittā"ti ettha hi nimittanti paccayassa nāmaṃ. "adhicittamanuyuttena bhikkhave bhikkhunā pañca nimittāni kālena kālaṃ manasikātabbānī"ti ettha kāraṇassa. "so taṃ nimittaṃ āsevati bhāvetī"ti ettha samādhissa. "yaṃ nimittaṃ āgamma yaṃ nimittaṃ manasikaroto anantarā āsavānaṃ khayo hotī"ti ettha vipassanāya. Idha pana rāgaṭṭhāniyo iṭṭhārammaṇadhammo "subhanimittan"ti adhippeto. Ayoniso

@4 cha.Ma.,i. aññasmiṃ 5 Ma. subhanimittā 6 aṅ.duka. 20/78/78 sanimittavagga