@4 cha.Ma. upapajjati 5 Sī.,cha.Ma. bhāriyaṃ pana hoti 6 cha.Ma. māressāmīti

@7 cha.Ma. manusso manussabhūtaṃ 8 cha.Ma. manussaarahantassa ca 9 cha.Ma. abhejjakāyatāya Lohitassa paggharaṇannāma natthi, sarīrassa pana antoyeva tasmiṃ ṭhāne lohitaṃ samosarati. Devadattena paviddhasilato bhijjitvā gatā sakalikā tathāgatassa pādantaṃ pahari, pharasunā saṃpahaṭo viya pādo antolohitoyeva ahosi. Tathā karontassa anantariyaṃ hoti. Jīvako pana tathāgatassa ruciyā satthakeneva cammaṃ chinditvā tamhā ṭhānā duṭṭhalohitaṃ nīharitvā phāsukamakāsi. Tathā karontassa puññakammameva hoti.

Atha ye parinibbute tathāgate cetiyaṃ bhindanti, bodhiṃ chindanti, dhātuṃ upakkamanti, tesaṃ kiṃ hotīti? bhāriyaṃ kammaṃ hoti anantariyasadisaṃ. Sadhātukaṃ pana thūpaṃ vā paṭimaṃ vā bādhiyamānaṃ bodhisākhaṃ chindituṃ vaṭṭati. Sacepi tattha nisinnā sakuṇā cetiye vaccaṃ pātenti, chindituṃ vaṭṭatiyeva. Paribhogacetiyato hi sarīracetiyaṃ mahantataraṃ. Cetiyavatthuṃ bhinditvā gacchantaṃ bodhimūlampi chinditvā harituṃ vaṭṭati. Yā pana bodhisākhā bodhigharaṃ bādhati, taṃ geharakkhanatthaṃ chindituṃ na labhati. Bodhiatthaṃ hi gehaṃ, na gehatthāya bodhi. Āsanagharepi eseva nayo. Yasmiṃ pana āsanaghare dhātu nihitā hoti, tassa rakkhanatthāya bodhisākhaṃ chindituṃ vaṭṭati. Bodhijagganatthaṃ ojāharaṇasākhaṃ vā pūtisākhaṃ vā chindituṃ vaṭṭatiyeva, sarīrapaṭijaggane viya puññaṃpi hoti.