@9 Ma. pāpakoti 10 cha.Ma. mahābhayabhīto Soṇa, vārehi tāta soṇā"ti āha. Kiṃ mahātherāti. Na passasi tātāti taṃ pavuttiṃ ācikkhi. Soṇatthero "kathañhi nāma mādisassa pitā niraye nibbattissati, patiṭṭhāpi tassa bhavissāmī"ti sāmaṇerehi nānāpupphāni āharitvā cetiyaṅgaṇabodhiyaṅgaṇesu talasaṇṭharaṇapūjaṃ āsanapūjañca karitvā pitaraṃ mañcakena cetiyaṅgaṇaṃ haritvā mañce nisīdāpetvā "ayaṃ mahātherena pūjā tumhākaṃ atthāya katā, `ayaṃ me bhagavā duggatapaṇṇākāro'ti vatvā bhagavantaṃ vanditvā cittaṃ pasādehī"ti āha. So mahāthero pūjaṃ disvā tathā karonto cittaṃ pasādesi. Tāvadevassa devaloko upaṭṭhāsi. Nandavanacittalatāvanamissakavanavimānāni ceva devanāṭakāni ca parivāretvā ṭhitāni viya ahesuṃ. So "apetha soṇa, apetha soṇā"ti theraṃ āha. Kimidaṃ therāti. Etā te mātaro āgacchantīti. Thero "saggo upaṭṭhito mahātherassā"ti cintesi. Evaṃ upaṭṭhānasamaṅgitā calatīti veditabbā. Etāsu idha āyūhanacetanākammasamaṅgitāvasena kāyaduccaritasamaṅgitāvasena ca "kāyaduccaritasamaṅgī"tiādi vuttaṃ.

Tattha eke ācariyā "yasmiṃ khaṇe kammaṃ āyūhati, tasmiṃyeva khaṇe tassa saggo avārito"ti vadanti. Apare pana "āyūhanakammaṃ nāma vipākavāraṃ labhantaṃpi atthi alabhantaṃpi. Tattha yadā kammaṃ vipākavāraṃ labhati, tasmiṃyeva kāle tassa saggo vārito"ti vadanti. Sesaṃ sabbattha uttānatthamevāti.

Aṭṭhānapālivaṇṇanā niṭṭhitā.