mūlaṃ mūlena saṃsaṭṭhaṃ sākhā sākhaṃ nisevare

asātasannivāsena tenambo kaṭukapphalo"ti āgataṭṭhāne viya hi idhāpi kaṭukanti tittikaṃ veditabbaṃ. Asātattāyāti amadhuratāya.

Imasmiṃ pana bījūpamasutte "diṭṭhīti niyatamicchādiṭṭhi gahitā"ti porāṇakattherā āhaṃsu. Taṃ pana paṭikkhipitvā "sabbānipi dvāsaṭṭhī diṭṭhigatānī"ti vuttaṃ. Anantarasutte "pāṇātipātā viramantassa adinnādānā viramantassa micchācārā viramantassa natthi tatonidānaṃ puññan"tiādinā nayena yathā diṭṭhi tathā kāyakammādīni yojetvā veditabbāni, idha pana sammādiṭṭhisahajātā cittaṭṭhapanāva paṭṭhanāti veditabbā. Sammādiṭṭhi panettha lokiyalokuttarā kathitā. Sesaṃ sabbattha uttānamevāti.

Dutiyavaggavaṇṇanā.