@8 vi.mahā. 5/259/24 cammakkhandhaka Majjhe pana tiyojanasatiko, pariyantaparikkhepena navamattayojanasatiko hoti. Ettake ṭhāne buddhapaccekabuddhabuddhupaṭṭhākabuddhasāvakā buddhamātā buddhapitā cakkavattirājāti ime sattā nibbattanti. Apica upādāyāpi majjhimappadese labbhati. Sakalopi hi jambūdīpo majjhimappadeso nāma, sesadīpā paccantimā janapadā. Tāmbapaṇṇidīpe anurādhapuraṃ majjhimappadeso nāma, seso paccantoti evaṃ nayo veditabbo.

[324] Paññavanto ajaḷā aneḷamūgāti ettha kammassakatapaññā jhānapaññā vipassanāpaññā maggapaññā phalapaññāti etāhi samannāgatā paññavanto nāma, amūḷhā ajaḷā nāma. Yesaṃ eḷā mukhato na galati, te aneḷamūgā nāma, aneḷamukhā niddosamukhāti attho. Paṭibalāti samatthā, kāyabalena ceva ñāṇabalena ca samannāgatā. Atthamaññātunti atthānatthaṃ kāraṇākāraṇaṃ jānituṃ. Duppaññāti apaññā nippaññā. Jaḷāti mandā mohā.

[325] Ariyena paññācakkhunāti saha vipassanāmaggena. Avijjāgatāti avijjandhakārena samannāgatā.

[326] Ye labhanti tathāgataṃ dassanāyāti ye tathāgatassa guṇe jānitvā tathāgataṃ cakkhuviññāṇena passituṃ labhanti.