[331] Saṃvijanīyesu ṭhānesūti saṃvejanīyesu kāraṇesu. Saṃvijantīti saṃvegaṃ āpajjanti.

[332] Yoniso padahantīti upāyena padhānaṃ viriyaṃ karonti.

[333] Vavassaggārammaṇanti vavassaggo vuccati nibbānaṃ, taṃ ārammaṇaṃ karitvāti attho. Labhanti samādhinti maggasamādhiñca phalasamādhiñca pāpuṇanti.

[334] Annaggarasaggānanti uttamannānaṃ ceva uttamarasānañca. Uñchena kapālābhatena yāpentīti uñchācārena vanamūlaphalāphalena vā kapālena vā ābhatābhatabhattena yāpenti. Ettha ca yo kassacideva khādanīyabhojanīyassa atthāya citte uppanne taṃkhaṇaṃyeva taṃ na labhati, ayaṃ annaggarasaggassa na lābhī nāma. Yassapi taṃkhaṇaṃyeva labhitvā olokentassa vaṇṇagandharasā amanāpā honti, ayaṃpi annaggarasaggānaṃ na lābhī nāma. Yassa pana vaṇṇagandharasā paṭilabbhanti manāpā honti, ayaṃ annaggarasaggānaṃ lābhī nāma. So uttamakoṭiyā cakkavattirājā, heṭṭhimakoṭiyā dhammāsoko veditabbo. Saṅkhepato hi yassa bhattassa ekā pāti satasahassaṃ agghati, idaṃ annaggarasaggannāma. Yaṃ pana bhikkhusaṃghaṃ piṇḍāya carantaṃ disvā manussā uttamappaṇītaṃ bhattaṃ denti, idaṃ kinnāmāti? idaṃ uñchena kapālābhatena yāpente upādāya annaggarasaggaṃ nāma vuccatīti.