17. Pasādakaradhammavaggavaṇṇanā

[366] Addhamidantiādīsu ekaṃsādhivacanametaṃ, addhā idaṃ lābhaṃ, ekaṃso esa lābhānanti vuttaṃ hoti. Yadidaṃ āraññakattanti yo ekaṃsaāraññakabhāvo. Idaṃ vuttaṃ hoti:- āraññakabhāvo nāma lābhānaṃ ekaṃso avassaṃ bhāvitattā na sakkā āraññakena lābhaṃ na labhitunti. Āraññako hi bhikkhu "attano araññavāsassa anucchavikaṃ karissāmī"ti pāpakannāma na karoti, athassa "āraññako ayaṃ bhikkhū"ti sañjātagāravo mahājano catupaccayapūjaṃ karoti. Tena vuttaṃ "addhamidaṃ bhikkhave lābhānaṃ yadidaṃ āraññakattan"ti. Sesapadesupi eseva nayo. Ettha pana bāhusaccanti bahussutabhāvo. Thāvareyyanti cirapabbajitattā thāvarappattabhāvo. Ākappasampadāti cīvaragahaṇādino ākappassa sampatti. Parivārasampadāti suciparivāratā. Kolaputtīti kulaputtabhāvo. Vaṇṇapokkharatāti sampannarūpatā. Kalyāṇavākkaraṇatāti vacanakiriyāya madhurabhāvo. Appābādhatāti ārogyasampatti. Arogo hi bhikkhu attano sarīrakalyāṇatāya vāsadhure ca ganthadhure ca paripūriko hoti, tenassa lābhā uppajjantīti.

Soḷasa pasādakaradhammā niṭṭhitā.