@3 cha.Ma. saṃvattanako 4 cha.Ma. uppannā kusalā nāmāti ime pāṭhā na dissanti

@5 Sī.,cha.Ma. uppādādisamaṅgino 6 Sī.,cha.Ma. javite 7 Sī.,cha.Ma. niruddhavipāko

@8 cha.Ma. saṅkhaṃ. evamuparipi 9 cha.Ma. kusalākusalakammaṃ Bhūmi nāma, te atītādibhedā honti. Tesu anusayitakilesā pana atītā vā anāgatā vā paccuppannā vāti na vattabbā. Atītakkhandhesu anusayitāpi hi appahīnāva honti, anāgatakkhandhesu anusayitāpi hi appahīnāva honti, paccuppannakkhandhesu anusayitāpi hi appahīnāva honti, idaṃ bhūmiladdhuppannaṃ nāma. Tenāhu porāṇā "tāsu tāsu bhūmīsu asamugghāṭitakilesā bhūmiladdhuppannaṃ nāmāti saṅkhyaṃ gacchantī"ti.

Aparaṃpi catubbidhaṃ uppannaṃ samudācāruppannaṃ ārammaṇādhiggahituppannaṃ avikkhambhituppannaṃ asamugghāṭituppannanti. Tattha sampati vattamānaṃyeva samudācāruppannaṃ nāma. Sakiṃ cakkhūni ummiletvā ārammaṇe nimitte gahite anussaritakkhaṇe kilesā nuppajjissantīti na vattabbā. Kasmā? ārammaṇassa adhigahitattā. Yathā kiṃ? yathā khīrarukkhassa kudhāriyā pahataṭṭhāne khīraṃ na nikkhamissatīti na vattabbaṃ, evaṃ. Idaṃ ārammaṇādhiggahituppannaṃ nāma. Samāpattiyā avikkhambhitakilesā pana imasmiṃ nāma ṭhāne na uppajjissantīti na vattabbā. Kasmā? avikkhambhitattā. Yathā kiṃ? yathā khīrarukkhaṃ kudhāriyā āhaneyyuṃ, imasmiṃ nāma ṭhāne khīraṃ na nikkhameyyāti na vattabbaṃ, evaṃ. Idaṃ avikkhambhituppannaṃ nāma. Maggena asamugghāṭitakilesā pana bhavagge nibbattassāpi uppajjantīti purimanayeneva vitthāretabbaṃ. Idaṃ asamugghāṭituppannaṃ nāma.