@4 ka. kāladubbalyaṃ, Ma. kāyadubbalyaṃ 5 abhi.vi. 35/856-60/429 ekakaniddesa

@6 cha.Ma. cittassa 7 abhi.saṃ. 34/1167/271 nikkhepakaṇḍa;dukanikkhepa Karontasseva kileso okāsaṃ na labhati, vattavasena vikkhambhito hoti. So taṃ tathā vikkhambhitameva katvā vivajjetvā arahattaṃ gaṇhāti mālakatissatthero viya.

So kirāyasmā rohaṇajanapade gameṇḍavāsimahāvihārassa bhikkhācāre nesādakule nibbatto. Vayaṃ āgamma katagharāvāso "puttadāraṃ posissāmī"ti aduhalasataṃ saṇṭhapetvā pāsasataṃ yojetvā sūlasataṃ ropetvā bahuṃ pāpaṃ āyūhanto ekadivasaṃ gehato aggiñca loṇañca gahetvā araññaṃ gato pāse baddhaṃ migaṃ vadhitvā aṅgārapakkaṃ maṃsaṃ khāditvā pipāsito hutvā gameṇḍavāsimahāvihāraṃ paviṭṭho pānīyamāḷake dasamattesu pānīyaghaṭesu pipāsāvinodanamattaṃpi pānīyaṃ alabhanto "kinnāmetaṃ ettakānaṃ bhikkhūnaṃ vasanaṭṭhāne pipāsāya āgatānaṃ pipāsāvinodanamattaṃ pānīyaṃ natthī"ti ujjhāyituṃ āraddho. Cūḷapiṇḍapātikatissatthero tassa kathaṃ sutvā tassa santikaṃ gacchanto pānīyamāḷake dasamatte pānīyaghaṭe pūre disvā "jīvamānapetakasatto ayaṃ bhavissatī"ti cintetvā "upāsaka sace pipāsitosi, piva pānīyan"ti vatvā kuṭaṃ ukkhipitvā tassa hatthesu āsiñci. Tassa kammaṃ paṭicca sītaṃ sītaṃ pānīyaṃ tattakapāle pakkhittaṃ viya vinassati, sakalaṃpi pānīyaṃ pivato pipāsā na pacchijji. Atha naṃ thero āha "yāva dāruṇañca te upāsaka kammaṃ kataṃ, idāneva peto jāto, vipāko kīdiso bhavissatī"ti.