@7 Sī. dasante 8 cha.Ma. tissamahāvihāraṃ 9 cha.Ma. ekakova agantvā 10 cha.Ma. paribbayo

@11 cha.Ma. tassevaṃ 12 cha.Ma. bhante thokaṃ āgamethāti Upasaṅkamitvā "ahaṃ kahāpaṇante bho purisa dammi, tvaṃ me pūṭakabhattaṃ dehī"ti āha. So cintesi "imaṃpi bhattaṃ imasmiṃ kāle māsakaṃpi na agghati, ayañca mayhaṃ ekavāreneva kahāpaṇaṃ deti, bhavissati tattha kāraṇan"ti cintetvā "nāhaṃ kahāpaṇena demī"ti āha. Evaṃ sante dve gaṇhāhi, tīṇi gaṇhāhīti iminā niyāmena sabbepi te kahāpaṇe dātukāmo jāto. Itaro "aññepissa atthī"ti saññāya taṃ "na demi"cceva āha. Atha naṃ so āha "sace me bho aññepi assu, tepi dadeyyaṃ. Na kho panāhaṃ attano atthāya gaṇhāmi, ekasmiṃ me rukkhamūle eko ayyo nisīdāpito, tuyhaṃpi kusalaṃ bhavissati, dehi me taṃ bhattan"ti. Tenahi bho gaṇha, āhara te kahāpaṇeti kahāpaṇe gahetvā pūṭakabhattaṃ adāsi. Upāsako bhattaṃ gahetvā theraṃ upasaṅkamitvā "pattaṃ nīharatha bhante"ti āha. Thero pattaṃ nīharitvā upaḍḍhabhatte dinne pattaṃ pidahi. Upāsako āha "ayaṃ bhante ekasseva paṭiviso, na sakkā mayā ito bhuñjituṃ. Tumhākaṃyeva me atthāya imaṃ pariyesitvā laddhaṃ, gaṇhatha naṃ mayi anukampaṃ upādāyā"ti. Thero "atthi kāraṇan"ti gahetvā sabbaṃ paribhuñji. Upāsako dhammakarakena pānīyaṃ parissāvetvā adāsi. Tato niṭṭhitabhattakicce there ubhopi maggaṃ paṭipajjiṃsu.

Thero upāsakaṃ pucchi "kena kāraṇena tvaṃ na paribhuñjī"ti. So attano gamanavidhānaṃ sabbaṃ kathesi. Thero taṃ sutvā saṃvegappatto cintesi "dukkaraṃ upāsakena kataṃ, mayā pana evarūpaṃ piṇḍapātaṃ paribhuñjitvā etassa kataññunā bhavitabbaṃ, sappāyasenāsanaṃ labhitvā tattheva chavimaṃsalohitesu sukkhantesupi nisinnapallaṅkeneva arahattaṃ appatvā na uṭṭhahissāmī"ti. So tissamahāvihāraṃ gantvā āgantukavattaṃ katvā attano pattasenāsanaṃ pavisitvā paccattharaṇaṃ attharitvā tattha nisinno attano mūlakammaṭṭhānameva gaṇhi. So tāya rattiyā obhāsamattaṃpi nibbattetuṃ