@saṃgho 4 cha.Ma. nibbattanti 5 cha.Ma. gaṇhitvā tehi 6 cha.Ma. paribhuñjitvā

@7 cha.Ma. piṇḍāpacāyanakammaṃ 8 Ma. sandhāretuṃ

Kākavaṇṇatissamahārājā "eko kira thero parinibbuto"ti sutvā vihāraṃ gantvā sakkārasammānaṃ katvā kūṭāgāraṃ sajjetvā theraṃ tattha āropetvā "idāni citakaṭṭhānaṃ gamissāmī"ti ukkhipanto cāletuṃ nāsakkhi. Rājā bhikkhusaṃghaṃ pucchi "atthi bhante therena kiñci kathitan"ti. Bhikkhū therena kathitavidhānaṃ ācikkhiṃsu. Rājā taṃ upāsakaṃ pakkosāpetvā "tayā ito sattadivasamatthake kassaci magge paṭipannassa bhikkhuno pūṭakabhattaṃ dinnan"ti pucchi. Āma devāti. Kena te niyāmena dinnanti. So taṃ kāraṇaṃ sabbaṃ ārocesi. Atha naṃ rājā therassa kūṭāgāraṭṭhāne pesesi "gaccha naṃ theraṃ sañjāna so vā añño vā"ti. So gantvā sāṇiṃ ukkhipitvā therassa mukhaṃ disvā sañjānitvā dvīhi hatthehi hadayaṃ paharanto rañño santikaṃ gantvā "deva mayhaṃ ayyo"ti āha. Athassa rājā mahāpasādhanaṃ dāpesi. Taṃ pasādhetvā āgataṃ "gaccha bhātika mahātissa mayhaṃ ayyaṃ vanditvā kūṭāgāraṃ ukkhipā"ti āha. Upāsako "sādhu devā"ti gantvā therassa pāde vanditvā ubhohi hatthehi ukkhipitvā attano matthake akāsi. Tasmiṃyeva khaṇe kūṭāgāraṃ ākāsena uppatitvā citakamatthake patiṭṭhāsi. Tasmiṃ kāle citakassa catūhipi kaṇṇehi sayameva aggijālā uṭṭhahiṃsu.