Kucchiṃ pūretvā ṭhitaajagarasadise vissaṭṭhakāyikacetasikaviriye kusītapuggale parivajjentassāpi, āraddhaviriye pahitatte puggale sevantassāpi, ṭhānanisajjādīsu viriyuppādanatthaṃ ninnapoṇapabbhāracittassāpi uppajjati. Tasmā ādikammiko kulaputto imehi ekādasahi kāraṇehi viriyasambojjhaṅgaṃ samuṭṭhāpetvā tameva dhuraṃ katvā abhinivesaṃ paṭṭhapetvā anukkamena arahattaṃ gaṇhāti. So yāva arahattamaggā viriyasambojjhaṅgaṃ bhāveti nāma, phale patte bhāvito nāma hotīti.

Ekādasa dhammā pītisambojjhaṅgassa uppādāya saṃvattanti:- buddhadhamma- saṃghasīlacāgadevatānussati upasamānussati lūkhapuggalaparivajjanā siniddhapuggalasevanā pasādanīyasuttantapaccavekkhaṇā tadadhimuttatāti.

@4 cha.Ma. vīriyeneva lokuttaradhammaṃ 5 cha.Ma. maggaṃ paṭipajjasi, na paṭipajjasīti