Ekādasa dhammā samādhisambojjhaṅgassa uppādāya saṃvattanti:- vatthuvisadakiriyatā indriyasamattapaṭipādanatā nimittakusalatā samaye cittassa paggaṇhanatā samaye cittassa niggaṇhanatā samaye sampahaṃsanatā samaye ajjhupekkhanatā asamāhitapuggalaparivajjanatā samāhitapuggalasevanatā jhānavimokkhapaccavekkhaṇatā tadadhimuttatāti. Tattha vatthuvisadakiriyatā ca indriyasamattapaṭipādanatā ca vuttanayeneva veditabbā.

Nimittakusalatā nāma kasiṇanimittassa uggahakusalatā. Samaye cittassa paggaṇhanatāti yasmiṃ samaye sithilaviriyatādīhi līnaṃ cittaṃ hoti, tasmiṃ samaye dhammavicaya- viriyapītisambojjhaṅgassa samuṭṭhāpanena cittassa paggaṇhanaṃ. Samaye cittassa niggaṇhanatāti yasmiṃ samaye accāraddhaviriyatādīhi uddhataṃ cittaṃ hoti, tasmiṃ samaye passaddhisamādhiupekkhāsambojjhaṅgassa samuṭṭhāpanena cittassa niggaṇhanaṃ. Samaye sampahaṃsanatāti yasmiṃ samaye cittaṃ paññāppayogamandatāya vā upasamasukhānadhigatena vā nirassādaṃ hoti, tasmiṃ samaye aṭṭhasaṃvegavatthupaccavekkhaṇena saṃvejeti. Aṭṭha saṃvegavatthūni nāma jātijarābyādhimaraṇāni cattāri, apāyadukkhaṃ pañcamaṃ, atīte vaṭṭamūlakaṃ dukkhaṃ, paccuppanne āhārapariyeṭṭhimūlakaṃ dukkhaṃ anāgate vaṭṭamūlakaṃ dukkhanti. Ratanattayaguṇānussaraṇeneva pasādaṃ janeti, ayaṃ vuccati "samaye sampahaṃsanatā"ti.

@pa.sū. 1/118/314 3 cha.Ma. atisithilavīriyatādīhi 4 cha.Ma. tassa