Satthā sāriputtattheraṃ āmantesi "sāriputta tayā pubbārāmaṃ gantuṃ vaṭṭati, tava ca parisaṃ gahetvā gacchāhī"ti. "sādhu bhante"ti thero attano parivārehi pañcahi bhikkhusatehi parivuto pubbārāmaṃ agamāsi. Eteneva niyāmena asītimahāsāvake pubbārāmameva pesetvā sayaṃ ekena ānandatthereneva saddhiṃ jetavanaṃ agamāsi. Ānandattheropi vihāre satthu vattaṃ katvā vanditvā "pubbārāmaṃ gacchāmi bhante"ti āha. Evaṃ karohi ānandāti. Satthāraṃ vanditvā tattheva agamāsi. Satthā ekakova jetavane ohiyati.
Taṃdivasañhi catasso parisā therasseva dhammakathaṃ sotukāmā ahesuṃ. Kosala- mahārājāpi balanikāyena parivuto pubbārāmameva gato. Tathā pañcasataupāsaka- parivāro anāthapiṇḍiko. Visākhā pana mahāupāsikā dvīhi jaṅghasahassehi parivutā
Sattapaṇṇāsāya kulusabhasatasahassānaṃ vasanaṭṭhāne sāvatthīnagare gehapāladārake ṭhapetvā sesajano gandhacuṇṇamālādīni gahetvā pubbārāmameva agamāsi. Catūsu dvāragāmesu gāvutaaḍḍhayojanayojanaparamaṭṭhāne sabbeyeva manussā gandhacuṇṇamālādīni gahetvā pubbārāmaṃ agamaṃsu. Sakalavihāropi pupphehi abhikiṇṇo viya ahosi.
Dhammasenāpatisāriputtattheropi kho vihāraṃ gantvā vihārapariveṇe aṅgaṇaṭṭhāne aṭṭhāsi. Bhikkhū therassa āsanaṃ paññāpayiṃsu. Thero tattha nisīditvā upaṭṭhākattherena vatte kate bhikkhusaṃghassa ovādaṃ datvā gandhakuṭiṃ pavisitvā samāpattiṃ appetvā nisīdi. So paricchinnakālavasena samāpattito vuṭṭhāya aciravatiṃ gantvā rajojallaṃ pavāhetvā paṭippassaddhadaratho otiṇṇatittheneva uttaritvā nivatthanivāsano saṅghāṭiṃ pārupitvā aṭṭhāsi. Bhikkhusaṃghopi sammukhaṭṭhānena otaritvā sarīrarajojallaṃ pavāhetvā paccuttaritvā theraṃ parivāreti. Antovihārepi therassa dhammāsanaṃ paññāpayiṃsu. Catassopi parisā attano attano okāsaṃ ñatvā maggaṃ ṭhapetvā nisīdiṃsu. Sāriputtattheropi pañcabhikkhusataparivāro dhammasabhaṃ āgantvā sīhamatthakapatiṭṭhite samussitasetacchatte ratanapallaṅke cittavījaniṃ gahetvā puratthimābhimukho nisīdi. Nisīditvā parisaṃ oloketvā "mahatī vatāyaṃ parisā, imissā na appamattakā parittakadhammadesanā anucchavikā, kataradhammadesanā nu kho anucchavikā bhavissatī"ti tīṇi piṭakāni āvajjamāno imaṃ saṃyojanapariyāyadhammadesanaṃ addasa.