Tasmiṃ pana ratanapāsāde adhivattho eko sotāpanno devaputto atthi, so buddhehi vā sāvakehi vā desanāya āraddhamattāyayeva jānāti "ayaṃ desanā uttānikā bhavissati, ayaṃ gambhīrā, ayaṃ jhānanissitā bhavissati, ayaṃ vipassanānissitā, ayaṃ magganissitā, ayaṃ phalanissitā, ayaṃ nibbānanissitā"ti. Sopi tasmiṃ divase therena desanāya āraddhamattāyaeva aññāsi "yena nīhārena mayhaṃ ayyena dhammasenāpatisāriputtattherena desanā āraddhā, ayaṃ desanā vipassanogadhā bhavissati, chahi mukhehi vipassanaṃ kathessati, desanāpariyosāne koṭisahassadevatā arahattaṃ gaṇhissanti, sotāpannādīnaṃ pana devamanussānaṃ paricchedo na bhavissati, desanānucchavikaṃ katvā mayhaṃ ayyassa sādhukāraṃ dassāmī"ti devānubhāvena mahantaṃ saddaṃ katvā "sādhu sādhu ayyā"ti āha.

Devarājena sādhukāre dinne parivārakapāsādasahasse adhivatthā devatā sabbāva sādhukāraṃ adaṃsu. Tāsaṃ sādhukārasaddena pubbārāme vasanadevatā, tāsaṃ saddena gāvutamatte devatā, tato aḍḍhayojane yojaneti etenupāyena ekacakkavāḷe, dvīsu cakkavāḷesu, tīsu cakkavāḷesūti dasasahassacakkavāḷe devatā sādhukāramadaṃsu. Tāsaṃ sādhukārasaddena paṭhaviṭṭhakanāgā tāva ākāsaṭṭhakadevatā ca. Tato abbhavalāhakā, uṇhavalāhakā, sītavalāhakā, vassavalāhakā, cātummahārājikā cattāro mahārājāno, tāvatiṃsā, sakko devarājā, yāmādevatā, suyāmo devarājā,

@4 Sī.,i. vipassanā kathiyissati 5 cha.Ma. koṭisatasahassadevatā 6 cha. pāpuṇissanti