@4 cha.Ma. abbhantare 5 cha.Ma.,i. divasampi

@6 ka. vasanti 7 cha.Ma. sīlavā vacchako, Sī.,i. sīlakavacchako Avijjā. Khāṇuke vacchakabandhanayottaṃ viya dasasaṃyojanāni. Vacchakā viya tīsu bhavesu nibbattasattā. Anto baddho bahisayitavacchako viya rūpārūpabhavesu sotāpanna- sakadāgāmino. Te hi kiñcāpi tattheva vasanti, saṃyojanaṃ pana tesaṃ kāmāvacarupanibandha- meva. Kenaṭṭhena? appahīnaṭṭhena. Rūpārūpabhavesu puthujjanopi ettheva saṅgahito. Sopi hi kiñcāpi tattha vasati, saṃyojanaṃ panassa kāmāvacarupanibandhameva. Bahi baddho antosayitavacchako viya kāmāvacare anāgāmī. So hi kiñcāpi kāmāvacare vasati, saṃyojanaṃ panassa rūpārūpabhavupanibandhameva. Anto baddho anto nipanno viya kāmāvacare sotāpannasakadāgāmino. Te hi sayaṃpi kāmāvacare vasanti, saṃyojanaṃpi tesaṃ kāmāvacarupanibandhameva. Bahi baddho bahi nipanno viya rūpārūpabhavesu anāgāmī. So hi sayaṃpi tattha vasati, saṃyojanaṃpissa rūpārūpabhavupanibandhameva. Anto abaddho antovicaraṇavacchako viya kāmāvacare khīṇāsavo. Bahi abaddho bahivicaraṇavacchako viya rūpārūpabhave khīṇāsavo. Saṃyojanesu pana sakkāyadiṭṭhi vicikicchā sīlabbataparāmāsoti imāni tīṇi gacchantaṃ nivārenti, gataṃ paṭimānenti. Kāmacchando byāpādoti imāni pana dve saṃyojanāni samāpattiyā vā avikkhambhetvā maggena vā asamucchinditvā rūpārūpabhave nibbattituṃ na sakkoti.

Katamo cāvusoti idaṃ thero yathāpi nāma puriso dve ratanapeḷāpasse ṭhapetvā sampattaparisāya dve hatthe pūretvā sattavidharatanaṃ bhājetvā dadeyya, evaṃ paṭhamaratanapeḷaṃ datvā dutiyampi tatheva dadeyya. Evameva "ajjhattasaṃyojanaṃ ca āvuso puggalaṃ desessāmi bahiddhāsaṃyojanañcā"ti imāni dve padāni mātikāvasena paṭhamaṃ ṭhapetvā idāni aṭṭhavidhāya parisāya bhājetvā dassetuṃ vitthārakathaṃ ārabhi.