Kāmānaṃyeva nibbidāyāti duvidhānaṃpi kāmānaṃ nibbindanatthāya ukkaṇṭhanatthāya. Virāgāyāti virajjanatthāya. Nirodhāyāti appavattikaraṇatthāya. Paṭipanno hotīti paṭipattiṃ paṭipanno hoti. Ettāvatā sotāpannassa ca sakadāgāmino ca pañcakāmaguṇika- rāgakkhayatthāya anāgāmimaggavipassanā kathitā hoti. Bhavānaṃyevāti tiṇṇaṃ bhavānaṃ. Iminā anāgāmino bhavarāgakkhayatthāya arahattamaggavipassanā kathitā hoti. Taṇhakkhayāya paṭipanno hotīti imināpi sotāpannasakadāgāmīnaṃyeva pañcakāmaguṇikataṇhāya khayakaraṇatthaṃ anāgāmimaggavipassanā kathitā. So lobhakkhayāyāti imināpi anāgāmino bhavalobhakkhayatthāya arahattamaggavipassanāva kathitā. Aññataraṃ devanikāyanti suddhāvāsesveva aññataraṃ devanikāyaṃ. Anāgantā itthattanti imaṃ khandhapañcakabhāvaṃ anāgantā, heṭṭhūpapattiko na hoti, uparūpapattiko vā hoti, tattheva vā parinibbāyati.
Iti paṭhamena aṅgena sukkhavipassakassa dhātukammaṭṭhānikabhikkhuno heṭṭhimāni dve maggaphalāni kathitāni, dutiyena samādhikammikassa tīṇi maggaphalāni, "so kāmānan"ti iminā sotāpannasakadāgāmīnaṃ pañcakāmaguṇikarāgakkhayāya uparianāgāmi- maggavipassanā, "so bhavānaṃyevā"ti iminā anāgāmissa upariarahattamaggavipassanā, "so taṇhakkhayāyā"ti iminā sotāpannasakadāgāmīnaṃ pañcakāmaguṇikataṇhakkhayāya uparianāgāmimaggavipassanā, "so lobhakkhayāyā"ti iminā anāgāmino bhavalobhakkhayāya upariarahattamaggavipassanā kathitāti. Evaṃ chahi mukhehi vipassanaṃ kathetvā desanaṃ yathānusandhiṃ pāpesi. Desanāpariyosāne koṭisatasahassadevatā arahattaṃ pāpuṇiṃsu, sotāpannādīnaṃ paricchedova nāhosi. Yathā ca imasmiṃ samāgame, evaṃ mahāsamayasutte maṅgalasutte cūḷarāhulovādasutte ca koṭisatasahassadevatā arahattaṃ pāpuṇiṃsu, sotāpannādīnaṃ devamanussānaṃ paricchedo nāhosi.
Samacittā devatāti cittassa sukhumabhāvasamatāya samacittā. Sabbāpi hi tā attano attabhāve sukhume cittasarikkhake katvā māpesuṃ. Tena samacittā nāma jātā. Aparenapi kāraṇena samacittā:- "therena samāpatti tāva kathitā, samāpattithāmo pana na kathito, mayaṃ dasabalaṃ pakkositvā samāpattiyā thāmaṃ kathāpessāmā"ti sabbāpi ekacittā ahesunti samacittā. Aparaṃpi kāraṇaṃ:- "therena ekena pariyāyena samāpattipi samāpattithāmopi kathito, ko nu kho imaṃ samāgamaṃ sampatto, ko na sampatto"ti olokayamānā tathāgatassa asampattabhāvaṃ disvā "mayaṃ tathāgataṃ pakkositvā parisaṃ paripuṇṇaṃ karissāmā"ti sabbā ekacittā ahesuntipi samacittā. Aparaṃpi kāraṇaṃ:- anāgate kocideva bhikkhu vā bhikkhunī vā devo vā manusso vā "ayaṃ desanā sāvakabhāsitā"ti agāravaṃ kareyya, sammāsambuddhaṃ pakkositvā imaṃ desanaṃ sabbaññubhāsitaṃ karissāma. Evaṃ anāgate