Aparaṃpi kāraṇaṃ:- sabbāpi hi tā ekasamāpattilābhiniyo vā ahesuṃ ekārammaṇalābhiniyo vā evaṃpi samacittā.

Haṭṭhāti tuṭṭhā āmoditā pamoditā. Sādhūti āyācanatthe nipāto. Anukampaṃ upādāyāti therassa anukampaṃ kāruññaṃ anudayaṃ paṭicca, na ca imasmiṃpi ṭhāne therassa anukampitabbakiccaṃ atthi. Yasmiñhi divase thero sūkarakhātaleṇadvāre bhāgineyyassa dīghanakhaparibbājakassa vedanākammaṭṭhāne kathiyamāne tālavaṇṭaṃ gahetvā satthāraṃ vījamāno ṭhito parassa vaḍḍhitabhojanaṃ bhuñjitvā khudaṃ vinodento viya parassa sajjitapasādhanaṃ sīse paṭimuñcanto viya ca sāvakapāramiñāṇassa nippadesato matthakaṃ patto, tasmiṃyeva divase bhagavatā anukampito nāma. Avasesānaṃ pana taṃ ṭhānaṃpi pattānaṃ devamanussānaṃ anukampaṃ upādāya gacchatu bhagavāti bhagavantaṃ yāciṃsu.

Balavā purisoti dubbalo hi khippaṃ sammiñjanapasāraṇaṃ kātuṃ na sakkoti, balavāva sakkoti. Tenetaṃ vuttaṃ. Sammukhe pāturahosīti sammukhaṭṭhāne puratoyeva pākaṭo ahosi. Bhagavā etadavocāti etaṃ "idha sāriputtā"tiādinā nayena attano āgamanakāraṇaṃ avoca. Evaṃ kirassa ahosi "sace koci bālo akataññū bhikkhu vā bhikkhunī vā upāsako vā upāsikā vā evaṃ cinteyya `sāriputtatthero mahantaṃ parisaṃ alattha, sammāsambuddho ettakaṃ adhivāsetuṃ asakkonto ussūyāya parisaṃ upaṭṭhāpetuṃ āgato'ti. So imaṃ mayi manopadosaṃ katvā apāye nibbatteyyā"ti. Athattano āgamanakāraṇaṃ kathentoeva "idha sāriputtā"tiādivacanaṃ avoca.

Evaṃ attano āgamanakāraṇaṃ kathetvā idāni samāpattiyā thāmaṃ kathetuṃ