@3 cha.Ma. vārena 4 cha.Ma. diṭṭhirāgādipadesupi Vasanaṭṭhānato sāvatthījanapado puratthimadisābhāge ahosi, thero ca nisīdantopi tadabhimukhova nisinno, tasmā evamāha. Udānaṃ udānesīti udāhāraṃ udāhari. Yathā hi yaṃ telaṃ mānaṃ gahetuṃ na sakkoti, vissanditvā gacchati, taṃ avasesakoti vuccati. Yañca jalaṃ taḷākaṃ gahetuṃ na sakkoti, ajjhottharitvā gacchati, taṃ oghoti vuccati, evameva pītivacanaṃ hadayaṃ gahetuṃ na sakkoti, adhikaṃ hutvā anto asaṇṭhahitvā bahi nikkhamati, taṃ udānanti vuccati, evarūpaṃ pītimayaṃ vacanaṃ nicchāresīti attho.

[39] Sattame gundāvaneti evaṃnāmake vane. Upasaṅkamīti "mahākaccānatthero kira nāma attano pitumattampi ayyakamattampi peyyakamattampi disvā neva abhivādeti na paccuṭṭheti na āsanena nimantetī"ti sutvā "na sakkā ettakena niṭṭhaṃ gantuṃ, upasaṅkamitvā naṃ pariggaṇhissāmī"ti bhuttapātarāso yenāyasmā mahākaccāno tenupasaṅkami. Jiṇṇeti jarājiṇṇe. Vuḍḍheti vayovuḍḍhe. Mahallaketi jātimahallake. Addhagateti dīghaṃ kāladdhānaṃ atikkante. Vayoanuppatteti pacchimavayaṃ anuppatte. Tayidaṃ bho kaccāna tathevāti bho kaccāna yaṃ taṃ amhehi kevalaṃ sutameva, taṃ iminā diṭṭhena sameti. Tasmā taṃ tatheva, na aññathā. Na hi bhavaṃ kaccāno brāhmaṇeti idaṃ attānaṃ sandhāya vadati. Ayaṃ kirassa adhippāyo:- amhe evaṃmahallake disvā bhoto kaccānassa abhivādanamattaṃpi paccuṭṭhānamattaṃpi āsanena nimantanamattaṃpi natthīti. Na sampannamevāti na yuttameva na anucchavikameva.

Thero brāhmaṇassa vacanaṃ sutvā "ayaṃ brāhmaṇo neva vuḍḍhe jānāti na dahare, ācikkhissāmissa vuḍḍhe ca dahare cā"ti desanaṃ vaḍḍhento atthi brāhmaṇātiādimāha. Tattha jānatāti sabbanayaṃ jānantena. Passatāti tadeva hatthe