Daharoti taruṇo. Yuvāti yobbanena samannāgato. Susu kāḷakesoti suṭṭhu kāḷakeso. Bhadrena yobbanena samannāgatoti yena yobbanena samannāgatattā yuvā, taṃ yobbanaṃ bhadrakanti dasseti. Paṭhamena vayasāti paṭhamavayo nāma tettiṃsavassāni, tena samannāgatoti attho. Paṇḍito therotveva saṅkhaṃ gacchatīti so evarūpo puggalo paṇḍitoti ca theroti ca gaṇanaṃ gacchatīti. Vuttaṃpi cetaṃ:-

"yamhi saccañca dhammo ca ahiṃsā saṃyamo damo

save vantamalo dhīro so theroti pavuccatī"ti.

[40] Aṭṭhame corā balavanto hontīti pakkhasampannā parivārasampannā dhanasampannā nivāsanaṭṭhānasampannā vāhanasampannā ca honti. Rājāno tasmiṃ samaye dubbalā hontīti tasmiṃ samaye rājāno tāsaṃ sampattīnaṃ