Tesaṃ evaṃ nānattaṃ veditabbaṃ:- pabbatavisamanissitā corā janapadavāsīnaṃ pesenti "mayaṃ asukadivase nāma tumhākaṃ gāmaṃ vilumpissāmā"ti. Te taṃ pavuttiṃ sutakālato paṭṭhāya bhayaṃ santāsaṃ āpajjanti. Ayaṃ cittutrāso nāma. "kathaṃ no corā kupitā anatthaṃpi āvaheyyun"ti hatthasāraṃ gahetvā dvipadacatuppadehi saddhiṃ araññaṃ pavisitvā tattha tattha bhūmiyaṃ nipajjanti ḍaṃsamakasādīhi khajjamānā, gumbantarāni pavisantā khāṇukaṇṭake maddanti. Tesaṃ evaṃ vicarantānaṃ vikkhittabhāvo anekaggatākāro nāma. Tato coresu yathāvuttadivase anāgacchantesu "tucchakasāsanaṃ bhavissati, kiṃ gāmaṃ pavisissāmā"ti saparikkhārā gāmaṃ pavisanti. Atha tesaṃ paviṭṭhabhāvaṃ ñatvā gāmaṃ parivāretvā dvāre aggiṃ datvā manusse ghātetvā corā sabbaṃ vibhavaṃ vilumpitvā gacchanti. Tesu ghātitāvasesā aggiṃ nibbāpetvā koṭṭhakacchāyābhitticchāyādīsu tattha tattha laggitvā nisīdanti naṭṭhaṃ anusocamānā. Ayaṃ upasaṭṭhākāro lagganākāro nāma.
Naḷāgārāti naḷehi channaparicchannā agāRā. Sesasambhārā panettha rukkhamayā honti. Tiṇāgārepi eseva nayo. Kūṭāgārānīti kūṭasaṅgahitāni agārāni.
@4 Ma. pavisanti 5 ka. gāmaṃ pavisāmāti Ullittāvalittānīti anto ca bahi ca littāni. Nivātānīti nivātappavesāni. Phusitaggaḷānīti chekehi vaḍḍhakīhi katattā piṭṭhasaṅghāṭasmiṃ suṭṭhu phusitakavāṭāni. Pihitakavātapānānīti yuttakavātapānāni. Iminā padadvayena kavāṭavātapānānaṃ niccaṃ pihitataṃ akathetvā sampattiyeva kathitā. Icchiticchitakkhaṇe pana tāni pidahiyanti ca vivariyanti ca.