Tiṇḍukālātanti tiṇḍukarukkhaalātaṃ. Bhiyyoso mattāya ciciṭāyatīti taṃ hi jhāyamānaṃ pakatiyāpi pappaṭikāyo muñcantaṃ ciciṭāti "ciciṭā"ti saddaṃ karoti, ghaṭṭitaṃ pana adhimattaṃ karotīti attho. Evameva khoti evameva kodhano attano dhammatāyapi uṭṭhito caṇḍikato hutvā carati, appamattakaṃ pana vacanaṃ vuttakāle "mādisaṃ nāma evaṃ vadati evaṃ vadatī"ti atirekataraṃ uṭṭhito caṇḍikato hutvā kujjhati. Gūthakūpoti gūthapuṇṇakūpo, gūtharāsiyeva vā. Opammasaṃsandanaṃ panettha purimanayeneva veditabbaṃ. Tasmā evarūpo puggalo ajjhupekkhitabbo na sevitabboti yasmā kodhano atiseviyamāno atiupasaṅkamiyamānopi kujjhatiyeva, "kiṃ iminā"ti paṭikkosantepi kujjhatiyeva. Tasmā palālaggi viya ajjhupekkhitabbo na sevitabbo na bhajitabbo. Kiṃ vuttaṃ hoti? yo palālaggiṃ atiupasaṅkamitvā tappati, tassa sarīraṃ jhāyati. Yo atipaṭikkamitvā tappati, tassa sītaṃ na vūpasammati. Anupasaṅkamitvā appaṭikkamitvā pana majjhattabhāve tappentassa sītaṃ vūpasammati, tasmā palālaggi viya kodhano puggalo majjhattabhāve ajjhupekkhitabbo na sevitabbo na bhajitabbo na payirupāsitabbo.

Kalyāṇamittoti sucimitto. Kalyāṇasahāyoti sucisahāyo. Sahāyā nāma sahagāmino saddhiṃ caRā. Kalyāṇasampavaṅkoti kalyāṇesu sucipuggalesu sampavaṅko, tanninnatappoṇatappabbhāramānasoti attho.