@4 cha.Ma. puttakānaṃ hi 5 cha.Ma.,i. ayaṃ pāṭho na dissati 6 Ma. iminā

@7 cha.Ma. maṅkulādīhi pāṇakehi daṭṭho 8 cha.Ma.,i. yadā panesa Putto dārābharaṇaṃ paccupaṭṭhāpetvā pāṭiyekkaṃ agāraṃ ajjhāvasati, tadā mātāpitūnaṃ "sakkotidāni no puttako attano dhammatāya yāpetun"ti majjhattabhāvo uppajjati, evaṃ tasmiṃ kāle upekkhā labbhatīti iminā kāraṇena "brahmāti mātāpitaro"ti vuttaṃ.

Pubbācariyāti vuccareti mātāpitaro hi jātakālato paṭṭhāya "evaṃ nisīda, evaṃ tiṭṭha, evaṃ gaccha, evaṃ saya, evaṃ khāda, evaṃ bhuñja, ayante tātāti vattabbo, ayaṃ bhātikāti, ayaṃ bhaginīti, idannāma kātuṃ vaṭṭati, idaṃ na vaṭṭati, asukannāma upasaṅkamituṃ vaṭṭati, asukaṃ na vaṭṭatī"ti gāhenti sikkhāpenti. Athāparabhāge aññe ācariyā hatthisippaassasipparathasippadhanusippamuddhāgaṇanādīni sikkhāpenti. Añño saraṇāni deti. Añño sīlesu patiṭṭhāpeti, añño pabbājeti. Añño buddhavacanaṃ uggaṇhāpeti, añño upasampādeti, añño sotāpattimaggādīni pāpeti. Iti sabbepi te pacchācariyā nāma honti, mātāpitaro pana sabbapaṭhamā, tenāha "pubbācariyāti vuccare"ti. Tattha vuccareti vuccanti kathiyanti. Āhuneyyā ca puttānanti puttānaṃ āhunapāhunaabhisaṅkhataannapānādīsu arahanti, anucchavikā taṃ paṭiggahetuṃ. Tasmā "āhuneyyā ca puttānan"ti vuttā. Pajāya anukampakāti paresaṃ pāṇe chinditvāpi attano pajaṃ paṭijagganti gopāyanti. Tasmā "pajāya anukampakā"ti vuttaṃ.

Namasseyyāti namo kareyya. Sakkareyyāti sakkārena paṭimāneyya. Idāni taṃ sakkāraṃ dassento "annenā"tiādimāha. Tattha annenāti yāgubhattakhādanīyena. Pānenāti aṭṭhavidhapānena. Vatthenāti nivāsanapārupanakena vatthena.