Kusalākusalesu pana yaṃ bahulaṃ hoti, taṃ yabbahulaṃ nāma. Taṃ dīgharattaṃ laddhāsevanavasena veditabbaṃ. Yaṃ vā balavakusalakammesu somanassakaraṃ, akusalakammesu santāpakaraṃ, etaṃ yabbahulaṃ nāma. Yadetaṃ yathā nāma dvīsu mallesu yuddhabhūmiṃ otiṇṇesu yo balavā, so itaraṃ pātetvā gacchati, evameva itaraṃ dubbalakammaṃ avattharitvā yaṃ āsevanavasena vā bahulaṃ, mahāsantāpavasena vā balavaṃ, taṃ vipākaṃ deti duṭṭhagāmaṇiabhayarañño kammaṃ viya.

So kira cullaṅgaṇiyayuddhe parājito vaḷavaṃ āruyha palāyi. Tattha cūḷupaṭṭhāko tissāmacco nāma ekakova pacchato ahosi. So ekaṃ aṭaviṃ pavisitvā nisinno jighacchāya bādhayamānāya "bhātikatissa ativiya no jighacchā bādhati, kiṃ karissāmā"ti āha. Atthi deva mayā sāṭakantare ṭhapetvā ekaṃ suvaṇṇasarakabhattaṃ ābhatanti. Tenahi āharāti. So nīharitvā rañño purato ṭhapesi. Rājā disvā "tāta cattāro koṭṭhāse karohī"ti āha. mayaṃ tayo janā, kasmā devo cattāro koṭṭhāse kāretīti. Bhātikatissa yato paṭṭhāya ahaṃ attānaṃ sarāmi, na me ayyānaṃ adatvā āhāro paribhuttapubbo atthi, svāhaṃ ajjapi adatvā na paribhuñjissāmīti. So cattāro koṭṭhāse akāsi. Rājā "kālaṃ ghosehī"ti āha. Chaḍḍitāraññe kuto ayye labhissāmi devāti. "nāyaṃ tava bhāro, sace mama saddhā atthi, ayye labhissāmi, vissaṭṭho kālaṃ ghosehī"ti āha. So "kālo bhante kālo bhante"ti tikkhattuṃ kālaṃ ghosesi.

Athassa bodhayamālakamahātissatthero taṃ saddaṃ dibbāya sotadhātuyā sutvā "katthāyaṃ saddo"ti taṃ āvajjento "ajja duṭṭhagāmaṇiabhayamahārājā yuddhaparājito aṭaviṃ pavisitvā nisinno ekaṃ sarakabhattaṃ cattāro koṭṭhāse kāretvā `ekaṃ