@4 Ma. bādhayamāno 5 Ma. deva 6 cha.Ma.,i. labhissāma
@7 cha.Ma.,i. bodhimātumahātissatthero Koṭaṭhāsaṃ paribhuñjissāmī'ti kālaṃ ghosāpesī"ti ñatvā "ajja mayā rañño saṅgahaṃ kātuṃ vaṭṭatī"ti manogatiyā āgantvā rañño purato aṭṭhāsi. Rājā disvā pasannacitto "passa bhātikatissā"ti vatvā theraṃ vanditvā "pattaṃ bhante dethā"ti āha. Thero pattaṃ nīhari. Rājā attano koṭṭhāsena saddhiṃ therassa koṭṭhāsaṃ patte pakkhipitvā "bhante āhāraparissayo nāma mā kadāci hotū"ti vanditvā aṭṭhāsi. Tissāmaccopi "mama ayyaputte passante bhuñjituṃ na sakkhissāmī"ti attano koṭṭhāsaṃ therasseva patte ākiri. Vaḷavāpi cintesi "mayhampi koṭṭhāsaṃ therasseva dātuṃ vaṭṭatī"ti. Rājā vaḷavaṃ oloketvā "ayampi attano koṭṭhāsaṃ therasseva patte pakkhipanaṃ paccāsiṃsatī"ti ñatvā tampi tattheva pakkhipitvā theraṃ vanditvā uyyojesi. Thero taṃ bhattaṃ ādāya gantvā ādito paṭṭhāya bhikkhusaṃghassa ālopasaṅkhepena adāsi.
Atha rājāpi cintesi "ativiyamhā jighacchitā, sādhu vatassa sace atirekabhattasitthāni pahiṇeyyā"ti. Thero rañño cittaṃ ñatvā atirekabhattaṃ etesaṃ yāpanamattaṃ katvā pattaṃ ākāse khipi, patto āgantvā rañño hatthe patiṭṭhāsi. Bhattampi tiṇṇampi janānaṃ yāvadatthaṃ ahosi. Atha rājā pattaṃ dhovitvā "tucchapattaṃ na pesessāmī"ti uttarasāṭakaṃ mocetvā udakaṃ puñchitvā sāṭakaṃ patte ṭhapetvā "patto gantvā mama ayyassa hatthe patiṭṭhātū"ti ākāse khipi. Patto gantvā therassa hatthe patiṭṭhāsi.
Aparabhāge rañño tathāgatassa sarīradhātūnaṃ aṭṭhamaṃ bhāgaṃ patiṭṭhāpetvā vīsaratanasatikaṃ mahācetiyaṃ kārentassa cetiye apariniṭṭhiteyeva kālakiriyāsamayo anuppatto. Athassa mahācetiyassa dakkhiṇapasse nisinnassa pañcanikāyavasena bhikkhusaṃghe