๘. วิสาขสุตฺตวณฺณนา

[๔๘] อฏฺฐเม ปญฺจาลิปุตฺโตติ ปญฺจาลีพฺราหฺมณิยา ๑- ปุตฺโต. โปริยา วาจายาติ ปริปุณฺณวาจาย. วิสฺสฏฺฐายาติ อปลิพุทฺธาย. อเนฬคลายาติ นิทฺโทสาย เจว อคลิตาย จ อวิปรีตพฺยญฺชนาย. ๒- ปริยาปนฺนายาติ วิวฏฺฏปริยาปนฺนาย. อนิสฺสิตายาติ วฏฺฏํ อนิสฺสิตาย. วิวฏฺฏนิสฺสิตเมว กตฺวา กเถติ, วฏฺฏนิสฺสิตํ กตฺวา น กเถตีติ อยเมตฺถ อธิปฺปาโย.

นาภาสมานนฺติ น อกเถนฺตํ. อมตํ ปทนฺติ นิพฺพานปทํ. ภาสเยติ โอภาเสยฺย. โชตเยติ ตสฺเสว เววจนํ. ปคฺคเณฺห อิสีนํ ธชนฺติ อพฺภุคฺคตฏฺเฐน นววิโธ โลกุตฺตรธมฺโม อิสีนํ ธโช นาม วุจฺจติ, ตเมนํ ปคฺคเณฺหยฺย, อุจฺจํ กตฺวา กเถยฺยาติ อตฺโถ. นวโลกุตฺตรธมฺมทีปกํ สุภาสิตํ ธโช เอเตสนฺติ สุภาสิตทฺธชา. อิสโยติ พุทฺธาทโย อริยา. ธมฺโม หิ อิสินํ ธโชติ เหฏฺฐา วุตฺตนเยเนว โลกุตฺตรธมฺโม อิสีนํ ธโช นามาติ.