4. Cakkavagga

1. Cakkasuttavaṇṇanā

[31] Catutthassa paṭhame cakkānīti sampattiyo. Catucakkaṃ vattatīti cattāri sampatticakkāni vattanti ghaṭṭiyantiyevāti attho. Paṭirūpadesavāsoti yattha catasso parisā sandassanti, evarūpe anucchavike dese vāso. Sappurisūpassayoti buddhādīnaṃ sappurisānaṃ upassayanaṃ bhajanaṃ. Na rājānaṃ. Attasammāpaṇidhīti attano sammāṭhapanaṃ. Sace pubbe assaddhādīhi samannāgato hoti, tāni pahāya saddhādīsu patiṭṭhāpanaṃ. Pubbe ca katapuññatāti pubbe upacitakusalatā. Idameva cettha pamāṇaṃ. Yena hi ñāṇasampayuttacittena kusalakammaṃ kataṃ hoti, tadeva kusalaṃ taṃ purisaṃ paṭirūpadese upaneti, sappurise bhajāpeti, soeva ca puggalo attānaṃ sammā ṭhapeti. Puññakatoti katapuñño. Sukhañcetaṃ adhivattatīti sukhañca etaṃ puggalaṃ adhivattati, avattharatīti attho.